ಒಡಲೊಳಗಿನ ಕಿಚ್ಚು

ಕಾಡ್ಗಿಚ್ಚು ಬಿರುಗಾಳಿಯೊಡಗೂಡಿ ಕಾಡಿನ ಜೀವರಾಶಿಯನ್ನ

ಕೆಲವೇ ತಾಸುಗಳೊಳಗೆ ಸುಟ್ಟು ಭಸ್ಮ ಮಾಡುವುದು 

ಆದರೂ, ಕಾರ್ಮೋಡಗಳಾವರಿಸಿದ ಆಗಸದಿಂದ ಮಳೆ ಸುರಿಯಲು

ಉರಿವ ಬೆಂಕಿ ನಿಧಾನವಾಗಿಯಾದರೂ ಶಮನವಾಗುವುದು;

ಧರೆಯ ಗರ್ಭದಲಿ ಅಡಗಿರುವಂತೆ ತೋರುವ ರಕ್ಕಸ ಬೆಂಕಿ

ಗರ್ಭವನ್ನೇ ನುಂಗಿ ಹಾಕುತ್ತ ಅವಿನಾಶವಾಗಿತ್ತು

ತಾನಿರುವುದು ಸತ್ಯವೆಂದು ಮನವರಿಕೆ ಮಾಡಲೆಂಬಂತೆ

ನುಂಗಿದ್ದೆಲ್ಲವನ್ನಆಗಾಗ್ಗೆ ಆಕಾಶದೆತ್ತರಕೆ ಹೊರ ಚೆಲ್ಲುತಲಿತ್ತು;

ನುಂಗಿ ಅರಗಿಸಿಕೊಳ್ಳಲಾಗದುದನ್ನ ಎಡೆಬಿಡದೆ ಕಕ್ಕುತಲಿರಲು,

ಊರು ಕೇರಿ, ಕಾಡು ಮೇಡು, ಹಳ್ಳ ಕೊಳ್ಳಗಳನ್ನ ಲೆಕ್ಕಿಸದೆ

ಮನದಿಚ್ಛೆಯಂತೆ ಸರಸರನೆ ಹರಿದು ಹೋಗುತ್ತಲಿರಲು,

ಈ ಬೆಂಕಿಯ ನಂದಿಸಲೆಂದು ಸಾಗರವೇ ಉಕ್ಕಿ ಒಮ್ಮೆ ಬರಲಾಗದೆ?

ಧರೆಯ ಒಡಲೊಳಗಿನಕಿಚ್ಚು ಧರೆಯನ್ನೇ ಸುಡುತ್ತಿರಲು

ಆಗಸವಾಗಲೀ, ಸಾಗರವಾಗಲೀ ನೀರ ಹರಿಬಿಟ್ಟರೇನು ಫಲ?

ನಮ್ಮ ಒಡಲೊಳಗಿನ ಕಿಚ್ಚು ಒಡಲನ್ನೇ ಸುಡುವಾಗ

ಬಾಹ್ಯದಲಿ ತೋರಿಕೆಗೆ ಮಾಡುವ ಶಮನದ ಕೆಲಸವೆಲ್ಲ ನಿಷ್ಪಲ.