ಮನುಜ ಮತ್ತೆ ಕಾಗೆ

ಮನುಜ:

ಕಾಗೇ, ನಿಂಗೆ ಗೊತ್ತಿಲ್ಲ ನೀನು ಕಡುಗಪ್ಪು

ನಿನ್ನ ಕಂಠ ಕರ್ಣ ಕಠೋರ

ಮುಟ್ಟಿಸಿಕೊಳ್ಳಲು ನೀನು ಅಯೋಗ್ಯ

ನೀನು ಅಪಶಕುನ!

ಸತ್ತವರ ಪಿಂಡ ತಿನ್ನಲಷ್ಟೆ ನೀನು ಯೋಗ್ಯ

ಕೋಗಿಲೆಯ ಕಂಠವದು ನಿನಗೆಲ್ಲಿ?

ಗುಡಿಯೊಳಕ್ಕಿಲ್ಲ ನಿನಗೆ ಪ್ರವೇಶ!

ನಿನ್ನ ಜೀವನವೇ ನಿರರ್ಥಕ!

ಕಾಗೆ:

ಸ್ವಚ್ಚಂದ ಆಗಸದಲಿ ಮನಬಿಚ್ಚಿ ಹಾರುವೆ

ನಿನ್ನ ಗುಡಿ ಪ್ರವೇಶ ನನಗೇಕಯ್ಯ? 

ಒಂದಗುಳು ಕಂಡೊಡನೆ ನನ್ನವರ ಕೂಗುವೆ

ನಮ್ಮವರಿಗೆ ನನ್ನ ಭಾಷೆ ಗೊತ್ತಿದೆ!

ಪಿಂಡ -ನೈವೇದ್ಯಗಳ ಭೇದವಿಲ್ಲ 

ಮೇಲು ಕೀಳೆನಲು ನಾ ಮನುಜನಲ್ಲ!

ಕೋಗಿಲೆಯ ಕಂಠ ಇಂಪಾದರೆನಗೇನು?

ಕೋಗಿಲೆಯ ಮೊಟ್ಟೆಗೂ ಕಾವು ಕೊಡುವೆ ನಾನು!

ಪರನಿಂದೆ,ತೋರ್ಪಡಿಕೆ ನನಗೇಕಯ್ಯ?

ನಿಸ್ವಾರ್ಥ ಸೇವೆಯೇ ನನ್ನ ಕಾಯಕ

ನನ್ನ ಜೀವನವೇ ಸಾರ್ಥಕ!