વનવગડામાં મઢૂલી મારી

વનવગડામાં મઢૂલી મારી, 

ગંગા થોડે દૂર .. હરિ, આવજો !

અષાઢ શ્રાવણની રાતડી, 

વાદલડીનું શું રૂપ !

માગો તો સાથે આવશે, 

પેલો ચંદરમા મીઠો અનૂપ .. હરિ, આવજો !

લીલી છે છમ્મ બધી ટેકરી,

બધી ફૂલ ભરી છે કુંજ; 

મ્હેંકે છે માલતી મંજરી, 

મારા પ્રેમી પ્રકાશના પુંજ .. હરિ, આવજો !

બોલે છે કોકિલા મોરલા, 

કરે વાયુ બંસી-સૂર.

લાંબી લાંબી મારી રાતડી, 

એક લાગી મિલનની ધૂન ... હરિ, આવજો !

પલક પડે ના માહરી, 

મારે હૈયે પ્રેમનું પૂર.

આવો તો અવસર છે દોહ્યલો, 

મારો પ્રાણ બને ચકચૂર ... હરિ, આવજો !

અવસર આવે, પણ ના આવો તો,

જીવ્યું તમારું ધૂળ ... હરિ, આવજો !