શ્યામ ! તમે મોરલી વગાડો

શ્યામ ! તમે મોરલી વગાડો હું નાચું,

શ્યામ ! તમે કાગળિયો ખોલો હું વાંચું.

ઓચિંતા ડાળ એક ઝૂલી રે સંગલાલ,

ગુલમ્હોરી સપનાઓ વાગ્યા.

ભીતરમાં પાંદડિયું ખુલી રે સંગલાલ,

છલ – છલ કસુંબાઓ માંગ્યા.

શ્યામ ! તમે મોરપીચ્છ ખોંસો ઈ સાચું !

શ્યામ ! તમે મોરલી વગાડો હું નાચું !

આંગણમાં વેરાણા મોતી ઓ મણીયારા,

મોતીડે મોતીડે ધબકારાં.

ધબકારાં કેમ કરી વીણું ઓ મણીયારા

ધબકારાં આંખ્યુંના પલકારાં.

શ્યામ ! તમે બોલો નહિ તો બધું કાચું !

શ્યામ ! તમે મોરલી વગાડો હું નાચું !