શોધુ છું
શોધુ છું
પરિચિત રહેલા વ્યક્તિઓની,
જીવંત વાતોને શોધુ છું,
આંટીઘૂંટી ભરેલા જીવનમાં,
સરળતાના રસ્તા ને શોધુ છું.
મુસાફરીના માર્ગ પર મારા જેવા,
રાહીના પ્રતિબિંબને શોધુ છું,
બચપનના મિત્રોનો અહેસાસ કરાવતી,
આ જિંદગીની શાળામાં રહેલા મિત્રોને શોધુ છું.
શાળારૂપી પરીક્ષાના જવાબોમાંથી,
જીવનરૂપી પરીક્ષાના જવાબોને શોધુ છું,
આંખોમાં આવેલા અશ્રુના પુરમાંથી,
હાસ્યના વાવાઝોડાને શોધુ છું.
હકીકતોના આ ઘરોમાં,
અધૂરા રહી ગયેલા સપનાઓને શોધુ છું,
જીવનના સાનિધ્ય કાળમાં,
પ્રકાશિત સૂરજની કિરણોને શોધુ છું.
એકલતાના વાતાવરણમાં,
સંબંધોના મેળાને શોધુ છું,
વાસ્તવિકતાના આ રંગમંચ પર,
આખરે હું, પોતાને જ શોધુ છું !