પ્રેમરસ પ્રકટાવો હૈયે

પ્રેમરસ પ્રકટાવો હૈયે, પ્રેમરસ પ્રકટાવો !

નાનકડા મારા અંતરમાં પ્રકટ બનીને ગાઓ

રોમરોમમાં રાસ રમી લો જીવન નવલ જગાવો... પ્રેમરસ પ્રકટાવો.

અમૃતથી આંખલડી આંજો, ઝેર બધાંય શમાવો

વાણીમાં મધુ વેદ વહાવો ! જડતા ભલે બહાવો !... પ્રેમરસ પ્રકટાવો.

કુશળ બની કારીગર મારી કંચન-કાય બનાવો !

પુલકિત કરો પ્રકાશ ભરીને, પર્વ પવિત્ર મનાવો... પ્રેમરસ પ્રકટાવો.

પ્રેમ બનીને તમે પ્રકટ હો, ગીત બનીને ગાઓ

'પાગલ' પ્રાણ તમોને તલસે, પિયૂષ તેને પાઓ... પ્રેમરસ પ્રકટાવો