પપ્પા

જવાબદારીનું બીજું નામ પપ્પા

હસતાં ચહેરે ભાર ઉપાડે પપ્પા !

હૃદય પર ભાર પણ મોં પર હાસ્ય

હોઠો પર સ્મિતનું કારણ છે પપ્પા !

મકાનનું ચણતર ‘ને આપણું ગણતર

પાયો મજબૂત કરે છે પપ્પા !

ખાલી ખિસ્સાં ‘ને દિલ છલોછલ

વરસાવે પ્રેમ દુલાર પપ્પા !

કેળવણી ‘ને અનુશાસનનાં આગ્રહી

કદીક તીખો વાર કરે પપ્પા !

દીકરીને ગણે દિલનો ટુકડો

પરણાવીને દિલને સમજાવે પપ્પા !

સલાહ સૂચન માંગે તો આપે

સ્વમાનભેર હંમેશાં જીવે પપ્પા !

બધાંય માટે મનગમતું લાવે

કદીક ના માંગે કશુંય પપ્પા !

કદીય જીવનમાં હિંમત ના હારે

શૂન્યમાંથી કરે સર્જન પપ્પા !

નિર્મોહી મન ‘ને સાદગી એમનો ગુણ

સાહિત્યની 'ચાહત' સંગાથે નીખરે પપ્પા !