માવઠું રે માવઠું

માણિગરને મળવા જાતા મેઘ રૂપાળાં

વરસી પડ્યાં વહેલાં જઈને હેતે વહાલાં

કોરાં ખેતર કાળજાં કેરા કટકા કેવા કણસે 

તળાવ તરસ્યાં તેતર આંબે લટક્યાં જણસે

કૂણી કૂંપળ ભૂખી તરસી માવઠે હરખાશે

ઉનો વાયરો વેગે વહેતો ભરખી એને જાશે 

કોઈનાં લીલાં બાગબગીચા મે થકી મુરઝાશે

ખંભે ખરતો લીલો પીળો મોર ભોંઈ પટકાશે 

નાગા નાગા ટાબરિયાં નહાતાં એ હરખાશે

રંગમાં પડતાં ભંગ વળી કંઈ કાળજે ભરખાશે

ચૂક્યાં એ ચોમાસું વરસી વાદળ વહેલા મોડા

દોડ્યાં નહીં કીધું ત્યારે દશમે દહાડે ઘોડા

માણિગરને મળવા જાતા મેઘ રૂપાળાં

વળગ્યાં વાતે વરસ્યાં થોડાં મોડા વહેલાં