મારું પિયર

જયાં રોક ટોક વિના હરવા ફરવાનું મળે,

જયાં નિશ્ચિંત બની વિહરવાનું મળે,

તમે તો પારકાં પંખી એવું સાંભળવાય મળે,

મને જ નહીં દરેક દીકરીને પિયર જવું ગમે.

જયાં માની મમતાને પિતાનો પ્રેમ મળે,

ભાઈની છત્રછાયાને બહેનની ઢાલ મળે,

સખીઓનો સમિયાણોને ભાભીનું હેત મળે,

મને જ નહીં દરેક દીકરીને પિયર જવું ગમે.

જયાં લાગણીઓની અવિરત લ્હાણી થાય,

જયાં વાત્સલ્યની નિત અમી વાદળી વરસે,

જયાં સ્નેહની અખૂટ સરવાણી વહે,

મને જ નહીં દરેક દીકરીને પિયર જવું ગમે.

જેના પાદરની ધૂળમાં મારું બાળપણ મળે

જેના મંદિરની ઝાલરમાં ઈશના આશિષ મળે,

જયાં ગયા પછી મારું મન ખુદને ભૂલે,

મને જ નહીં દરેક દીકરીને પિયર જવું ગમે.