જિંદગીની ચોપાટ

આ વાદળો ઘેરાયા આકાશમાં

ને આંખોથી તો હું વરસ્યો છું

સમંદર ખુદ મૃગજળનો થઈને

અંતે તો બસ તરસ્યો જ છુ

વેર વિખેર વ્યથાઓને હૃદયના

ખૂણે ભેગી કરી લીધી તો

શબ્દોમાં ઘૂંટાઈ ઘૂંટાઈને

હવે પ્રેમ પક્તિઓમાં ગૂંથાયો છું

અફસોસ દુન્યવી દુશ્મનોનાં

દગાનો લગીરે નથી મુજને

પણ સ્વજનોના સહવાસથી

ખૂબ જ સારી રીતે ઘવાયો છું

આ ધરા-આકાશનાં મિલનમાં

ફૂટી'તી એક ખુશીની અટકળ

હર વખત મંઝીલની ક્ષિતિજે જઈ

બસ આમજ છેતરાયો છું

જિંદગીની આ ચોપાટમાં

ધર્મરાજ યુધિષ્ઠિરની માફક જ

જીતની લાલચમાં હું ખુદને

દ્રૌપદી બનાવીને પસ્તાયો છું

દીપક તો પ્રગટાવી દીધા

આ વહેતી હવાઓના ભરોસે ને

એ જ હવાઓ હવે ગતિમાન થઇ

તો હું જ હવે મૂંઝાયો છું

"પરમ" લાગણીઓના ચક્રવ્યૂહમાં

અભિમન્યુની જેમ જ

"પાગલ" મુક્તિની અભિલાષાની

આંધીઓમાં અટવાયો છું