ବର୍ଷା
ବର୍ଷା
1 min
6.8K
ନୁଆଁଣିଆ ଛପରଟା
କେତେ ଆଉ ଯୁଝିଥାନ୍ତା
ସେଇ ଘର ;
ଯେଉଁଠି ଦିନରେ ଖରା
ରାତିରେ ତାରା
ସବୁ ଥାଇ ନଥିବାର ଅନୁଭବ
ଠିକ ସେ ମତି ହରା
ତରୁଣୀଟା ପରି
ଅବୟବକୁ ଢାଙ୍କିବାକୁ
କେଉଁ ଅବା ନିଘା ତାର !
ତମେ ବର୍ଷାକୁ ଜୀବନ କହିପାର
ଅବା ଯାତନା
ହୁଏତ ଯାତନାର ଭିନ୍ନ ନାମ
ଏ ଜୀବନ !
ଏପଟେ ସହରର କଡେ କଡେ
ଉଛୁଳା ନଈର ସୁଅ
ଆଁ କରି ଚାହିଁ ବସିଛି
କ୍ଷଣକରେ ଗିଳି ବସିବ
ଏ ନାହି କଟା ଛୁଆ ଗୁଡାକୁ
ହାତ ଠାରି ଡାକି ନେଇ
ଅଥଳ ତା କୋଳକୁ !!
ସେପଟେ ସହରରେ
ଯନ୍ତ୍ରଣାର ହାହାକାର
ତଳ ବସ୍ତି କଥା ଫୁ
ରାଜ ରାସ୍ତା ଉବୁଟୁବୁ !
ଅଟ୍ଟାଳିକାକୁ ଅଟ୍ଟହାସ୍ୟ
ସେ ବର୍ଷାର
ମଦନରେ,
ତୋ ନୁଆଁଣିଆ ଚାଳକୁ
ତୁ ଆଶା ଭିଡ଼ିଛୁ !
କିଛି ଫରକ ନାହିଁ
ଏ ସହରର ଭାଗ୍ୟ
ଆଉ ତୋ
ଫଟା ଚାଳଟା ଭିତରେ !!!!!
© ଶାରଦା ପ୍ରସାଦ ପରିଡ଼ା