ଆ କା ମା ବୈ
ଆ କା ମା ବୈ
ଆ କା ମା ବୈ
**************
ଆଷାଢ ମାସ ର ଦ୍ବିତୀୟା ତିଥିରେ
ଜଗନ୍ନାଥଙ୍କ ର ରଥ ।
ଗଡି ଗଡି ଯାଏ ସବୁ ଦୁଃଖ ନେଇ
ଖୋଲିଦିଏ ମୁକ୍ତି ପଥ ।
କାର୍ତ୍ତିକ ମାସର ପୂର୍ଣ୍ଣିମା ତିଥିରେ
ବନ୍ଦାଣ ହୁଏ ବୋଇତ ।
ସର୍ବ ପାପ ନାଶ କରିଯାଏ ଜାଣ
ସୁଖ ପାଆନ୍ତି ଭକତ ।
ମାର୍ଗଶିର ମାସ ଶେଷ ଗୁରୁବାରେ
ଆସିଥାନ୍ତି ଲକ୍ଷ୍ମୀ ମାତ ।
ଘର ଘର ବୁଲି ଦୁଃଖ ବୁଝିଥାନ୍ତି
ଉଡାଇ ତାଙ୍କର ନେତ ।
ବୈଶାଖ ମାସରେ ପ୍ରଭୁ ବିରାଜନ୍ତି
ଦିଅନ୍ତି ଭକ୍ତ ଦର୍ଶନ ।
ସର୍ବ ଭକ୍ତ ଜନ କରିଣ ଦର୍ଶନ
ଲଭିଥାନ୍ତି କୋଟି ପୁଣ୍ୟ ।
ସେଥି ପାଇଁ ବୋଧେ ଏ ଚାରି ମାସ
ଅଟଇ ଧରମ ମାସ ।
ଭଗତ ଜନେ ସାଧୁ ଗୁଣି ଜନେ
କରନ୍ତି ନିତ୍ୟ ହବିଷ ।
ଆସିଥାଏ ଯେବେ କାର୍ତ୍ତିକ ମାସଟି
ଲାଗଇ କେତେ ଆନନ୍ଦ ।
ଦିଶଇ ଆକାଶେ ତାରାଫୁଲ କେତେ
ଶୁଭୁଥାଏ ଶଙ୍ଖ ନାଦ ।
ଘରେ ଘରେ ହୁଏ ଭଜନ କିର୍ତ୍ତନ
ମାଁ ବୃନ୍ଦାବତୀ ପାଶ ।
ପୁରାଣ ପାଠରେ ପ୍ରକମ୍ପିତ ହୁଏ
ଝରୁଥାଏ ସୁଧା ରସ ।
ନଦୀ ତୀର ପୁଣି ପଡଇ ଉଛୁଳି
ହୁଳହୁଳି ଶଙ୍ଖ ନାଦେ।
ସ୍ମରଣ କରିଣ ଉତ୍କଳର ଗାଥା
ଗାଉଗାଉ ପ୍ରତିପାଦେ।
ଗର୍ବ ଲାଗେ ଶୁଣି ଇତିହାସ କଥା
ମନେ ପଡେ ବୋଇତକୁ ।
ସାଧବ ପୁଅ ଯେ ଆଣୁ ଥିଲେ ଧନ
ଆମ ଏହି ରାଇଜକୁ ।
ଅଛି ପରମ୍ପରା ଅଛି ଯେ ସଂସ୍କୃତି
ଲିଭିବନି ଜମା କେବେ ।
ମନ ଉଲ୍ଲାସରେ ଭସାଇବା ଚାଲ
ଏକ ହୋଇ ନାଆ ସର୍ବେ।
ଆସ ଲୋ ସଙ୍ଗାତ ଆସ ଲୋ ମିତଣୀ
ଆସ ଆସ ସୁଧି ଜନ ।
ଆକାମାବୈ ବୋଲି ପ୍ରଭାତୁ ପ୍ରଭାତୁ
କରିବା ବୋଇତ ବନ୍ଦାଣ ।
*****************
ଶ୍ରୀ ଡମ୍ବରୁଧର ବାଗ, ଚପ୍ରିଆ, ଗୋଲାମୁଣ୍ଡା ,
ଜିଲ୍ଲା - କଳାହାଣ୍ଡି ।
ଦୂରଭାଷ -୯୧୭୮୨୨୫୭୬୪