ହିଂସା
ହିଂସା
1 min
6.7K
ହିଂସା
ଉମାଶଂକର ସାହୁ
ଧୁଃ ଧୁଃ ତାତି
ସାମ୍ପ୍ରଦାୟିକତାର,
ଲିଭିଯାଏ ମୈତ୍ରୀ,
ହୁ ହୁ ଜଳିଉଠେ ସହର ।
ଖାଁ ଖାଁ ଗାଁ ରାସ୍ତା-
ଚାରିଆଡେ ହିଂସାର ଫଁ ଫଁ ଫୁତ୍କାର,
ଘରେ ଘରେ ବିଭୀଷିକା,
ମୁହେଁ ମୁହେଁ ଘୃଣା ଆଉ
କଣେ କଣେ ଅହିରାଜ
ଓଗାଳଇ ଜହର ।
ଦେହେ ଦେହେ ରକ୍ତଛିଟା
ହାତେ ହାତେ ଖଂଡା କାତି
ପ୍ରାଣେ ପ୍ରାଣେ ଘୃଣା
ଗଗନେ ପବନେ ଶୁଭେ,
ଧର୍ଷିତାର ବୁକୁଫଟା ଚିତ୍କାର ।
ଧୁଃ ଧୁଃ ତାତି ସାମ୍ପ୍ରଦାୟିକତାର
ଲିଭିଯାଏ ମୈତ୍ରୀ,
ହୁ ହୁ ଜଳିଉଠେ ସହର ।