ଛୋଟ ମୋ ଚାଳ ଘର

ଛୋଟ ମୋ ଚାଳଘର    ଛୋଟ ମୋ ଚାଳ ଘର

ଅଟଇ ସତେ ସରଗପୁର    ଝାଟି ମାଟିର ନଡା ଛପର

ହସ ଖୁସିରେ ଚଳେରେ ଯହିଁ  ମୋ ତେଲ ଲୁଣ ସଂସାର 

ଛୋଟ ମୋ ଚାଳଘର............||

ଏ ଘରଟିରେ ଜନମ ମୋର  ବଢିଛି ପାଇ ସ୍ନେହ ଆଦର

ଏହାର ପାଣି ପବନେ ଗଢା  ମୋ ପଞ୍ଚଭୂତ ଶରୀର 

ଛୋଟମୋ ଚାଳଘର....||

ଭାଇ ଭଉଣୀ ବୁଢି ମା ପାଶେ ଗପ ଶୁଣୁ ଶୁଣୁ ନିଦ ଆସେ

ବୁଢିମାଆଙ୍କ ଗେଲ ବସରେ  ଦିନ ବିତଇ ଆମର

ଛୋଟ ମୋ ଚାଳ ଘର.........||

ବାପାଙ୍କ ସ୍ନେହ ବୋଉଙ୍କ ଗେଲ  ଆମରି ପାଇଁ ଅମୂଲମୂଲ

ବାଇ ଚଢେଇ ବସା ଅଟଇ  ବୋଉ କୋଳଟି ଆମର

ଛୋଟ ମୋ...............||

ବୋଉ ଆକଟ ବାପାଙ୍କ ଗାଳି  ଅବାଟେ ଗଲେ ଖାଇଛୁ ଛାଟ

ଭଲ ବାଟରେ ଚାଲିବା ପାଇଁ  ଯେତେ ପ୍ରଚେଷ୍ଟା ତାଙ୍କର 

ଛୋଟ ମୋ................||

ଜେଜେ ବାପାଙ୍କ ଗପ ପସରା ଆମ ସଭିଙ୍କର ଅପାସୋରା

ତାଙ୍କ ସରସ ଶ୍ରୁତି ମଧୁର   ଯେତେ କାହାଣୀ ତାଙ୍କର  

ଛୋଟ ମୋ................||

ଜେଜେ ବାପାଙ୍କ ଢଗ ଢମାଳି ଅନେକ କଥା ଶିଖାଏ ବୋଲି

ଜୀବନ ଯୁଦ୍ଧେ ଯାଉନି ହାରି  ନାତି ନାତୁଣୀ ତାଙ୍କର

ଛୋଟ ମୋ...................||

କାଳ ବୈଶାଖୀ ଝଡ ବରଷା   ଚାଳ ଉଡାଇ ଦିଏ ସହସା

ତାହାକୁ ତିଳେ ଯାଉନି ଡରି   କରୁ ଛଣରେ ଛପର

ଛୋଟ ମୋ....................||

ଖରା ଶୀତକୁ ଭାରି ବଢିଆ  ନିଆଁ ପାଣି ତା ପାଇଁ ଅଡୁଆ

 ଗୋବର ଲିପା ମାଟି ଚଟାଣ ମାଟିର କାନ୍ଥ ତାହାର

ଛୋଟ ମୋ..................||

ନିଆଁ ପାଣିକୁ ଥିଲେବି ଡର  ସରି ନୁହଁଇ ମାର୍ବଲ ଘର

ସବୁ ସମ୍ପର୍କ ଅଟେ ମଜବୁତ କଂକ୍ରୀଟ ସମ ଏଠାର

ଛୋଟ ମୋ.................||

ବାର ମାସରେ ତେର ପରବ  ଆମ ସଂସ୍କୃତି ଆମ ଗରବ

ସାଇତି ରଖି କରେ ପ୍ରଚାର  ଦେଇ ଆନନ୍ଦ ଅପାର

ଛୋଟ ମୋ ...............||

ଏଠାର ଢିଙ୍କି କୂଟା ଚାଉଳ  ଅଟଇ ଆମ ସ୍ବାସ୍ଥ୍ୟର ମୂଳ

ଚଉରା ମୂଳେ ସଞ୍ଜ ସକାଳେ  ବୃନ୍ଦାବତୀ ପୂଜନର

ଛୋଟ ମୋ ..............||

ବାତ୍ୟାବଇରୀ ବନ୍ୟାଭଗାରି ଆସିଲେ ଆମେ ଯାଉନା ଡରି

ଯୁଗ ଯୁଗର ସାଥି ଆମରି    କରିଦିଏ ନାରଖାର  

ଛୋଟ ମୋ.................||

ସୁଖ ଶାନ୍ତିର ଏକ ମନ୍ଦିର ସ୍ନେହ ଭକତି ପୂଜାର୍ଘ୍ୟ ତାର

 ପ୍ରୀତି ମମତା ଥାଏରେ ଯହିଁ ବାନ୍ଧି ପରାଣ ଆମର

ଛୋଟ ମୋ...........||

ଟାହି ଟାପରା କଲେବି ଯେତେ ସହିଯାଉରେ ଶକତି ମତେ

 ଭାଗ୍ୟ ଆଦରି ଥାଉରେ ଆମେ ନକରି ତାକୁ ଖାତର

ଛୋଟ ମୋ .............||

ଅଟଇ ସେତ ସରଗ ପୁର ପ୍ରୀତି ମମତା ସୁଖ ଶାନ୍ତିର

 ହସ ଖୁସିରେ ଥାଉରେ ଯହିଁ ମିଳିମିଶି ନିରନ୍ତର

ଛୋଟ ମୋ...........||

ଜନମ ଏଠି ମରଣ ଏଠି  ଯେତେ ଧରମ କରମ ଏଠି

ଏଠୁ ଶ୍ମସାନ  ଚଳିବ ଶେଷେ ଶୋକାକୁଳ ଶବାଧାର 

ଛୋଟ ମୋ................||