ନିଃସ୍ୱାର୍ଥ ପ୍ରେମ

କିଏ କହୁଥାଏ ମିଳନରେ ପ୍ରେମ

ସାର୍ଥକ ହୁଅଇ ବୋଲି

କିଏ କୁହେ ପୁଣି ବିଚ୍ଛେଦ ଘଟିଲେ

ପ୍ରେମ ଯାଏ ଦୂରେ ଚାଲି ।

କିଏ କୁହେ ପୁଣି ପ୍ରେମଟା ମୋହର

ବିଶ୍ୱାସରେ ଦେଲା ବିଷ

କିଏ କହୁଥାଏ ପ୍ରେମ କରି ମୋର

ଓଠରୁ ଲିଭିଲା ହସ ।

କିଏ ସାଜୁଅଛି ଦେବଦାସ ଏଠି

ପ୍ରେମିକା କରିଲେ ପର

ପ୍ରେମ ପାଇଁ କିଏ ଛାଡିଚାଲିଯାଏ

ନିଜ ଘର ପରିବାର ।

କିଏ କୁହେ ପ୍ରେମ ହାତରେ ମୋହର

ଦୁଃଖର ଜହର ଦେଲା

କିଏ କୁହେ ପୁଣି ଛଳନା ପ୍ରେମଟା

ମୋତେ ବାଟବଣା କଲା ।

କିଏସେ ଜୀବନ ହାରି ଦେଉଅଛି

ପ୍ରେମରେ ପାଇଲେ ଧୋକା

ପାଗଳ ପରିକା ବୁଲୁଛି କିଏସେ

ଛାଡିଲା ପରେ ପ୍ରେମିକା ।

ହେଲେ ମୋ ପ୍ରେମରେ ମିଳନ ନାହିଁକି

ବିଛେଦର ନାହିଁ ଭୟ

ପ୍ରେମ ନୁହେଁ ଖେଳ ମିଳିବ ସେଥିରେ

ଜୟ ଅବା ପରାଜୟ ।

ନିଃସ୍ୱାର୍ଥ ଭାବରେ ଭଲ ମୁଁ ପାଉଛି

ପାଉଥିବି ମଲାଯାଏ

କାହିଁକି ଆଘାତ ପାଇବି କହିକି

ତୁମକୁ ମୁଁ ଭଲପାଏ ।

ଅପ୍ରକାଶ୍ୟ ଏହି ପ୍ରେମର ଭାବନା

ଅଛି ମୋର ହୃଦୟରେ

ଭଲ ମୁଁ ପାଉଛି ଭଲ ପାଉଥିବି

ନିସ୍ୱାର୍ଥପର ଭାବରେ ।

ମୋ ପ୍ରେମର ଖୁସି କେତେ ଯେ ନିଆରା

ସେକଥା ଜାଣିଛି ମୁହିଁ

କେତେ ହରେଇଛି କେତେ ଯେ ପାଇଛି

ସେ ଅଙ୍କ ମୁଁ କଷୁ ନାହିଁ ।