ପୁରସ୍କାର
ପୁରସ୍କାର
ପୁରସ୍କାର ଗୋଟେ ଦିଅ ମତେ ଭାଇ
ପୁରସ୍କାର ଗୋଟେ ଦିଅ
ରାତାରାତି ମୁହିଁ ହୋଇବି ପ୍ରସିଦ୍ଧ
ମିଡିଆ ହେବ ଅଥୟ ।
ଖବରକାଗଜେ ନିତି ବାହାରିବ
ନାମ ମୋ ବଡ ଅକ୍ଷରେ
କିଏ ଲେଖିଦେବ ବିରୁଦ୍ଧରେ ମେଞ୍ଚେ
ଆଉ କିଏ ସପକ୍ଷରେ ।
କିଏ ନେଇ ମୋର ବହିକୁ ଜାଳିବ
ରାଜଧାନୀ ରାସ୍ତା ପରେ
ଦେଖୁଥିବି ତା’ର ଲାଇଭ୍ ଟେଲିକାଷ୍ଟ୍
ବସିକି ସୋଫା ଉପରେ ।
କିଏ ମାଗୁଥିବ ଦୋକାନକୁ ଯାଇ
ଦେଖିବା ବହିଟା କ’ଣ
ଆଉ କିଏ ଯିବ ମୋଡି କି ମୁହଁକୁ
ଗାଳିରେ କରିକି ସ୍ନାନ ।
ମୋର ଲାଗି ଯେତେ ବଡ ସାହିତ୍ୟିକ
ଯୁଦ୍ଧଂ ଦେହି ଡାକ ଦେଇ
ରାତି ଦିନ ଖାଲି ମିଡିଆ ଆଗରେ
ଦେଇ ଚାଲିବେ ସଫେଇ ।
ଗୁଣ୍ଡୁଚି ମୂଷାଠୁ ପାଇକି ପ୍ରେରଣା
ବାନ୍ଧିବିନି ସେତୁବନ୍ଧ
ବାଟରେ ହଗିକି ନାଁ କରିବାରେ
ରହିଛି ବଡ ଆନନ୍ଦ !
ରାତାରାତି ବହି ବିକ୍ରି ବଢିଯିବ
ଯେତେ ହେବ କଣ୍ଟ୍ରୋଭର୍ସି
କିନ୍ତୁ ଭାଗ୍ୟଦେବୀ ହେଉନି ସଦୟ
ଦେଖିବାକୁ ମୋର ଖୁସି !
ପୁରସ୍କାର ମତେ ଦିଅ ମୋର ଭାଇ
ରଖିବି ନେଇ ଯତନେ
ଦିନ କେଇଟାରେ ଯୁକ୍ତିତର୍କ କଥା
କାହାର ଥିବ ବା ମନେ !
ପରବର୍ତ୍ତୀ ପିଢି ଛାତିକୁ ଗର୍ବରେ
ଫୁଲେଇ ଚାଲିବେ ବାଟେ
ମତେ ପଛେ ମିଳୁ ନିନ୍ଦା ଅପବାଦ
ଡରିବି ନାହିଁ ମୁଁ ମୋଟେ ।
ପୁରସ୍କାର ଗୋଟେ ପାଇବା ଆଶାରେ
କେତେ କରିଛି ମୁଁ ଫନ୍ଦି
ତଥାପି ଦେଖ ସେ ପୁରସ୍କାର ମୋର
ହାତେ ନହୁଅଇ ବନ୍ଦି !
ପୁରସ୍କାର ଆଶା ବଡ ବିଷମ ଲୋ
ନଜାଣଇ ଭଲମନ୍ଦ
ପାଇବେ ଅଗାଡି, ଉଡିଯିବ ଧାନ
ଆଜିର ଏହି ନିୟମ ।