ଆହେ ଚକାଆଖି

ଆହେ ଚକାଆଖି ସୃଷ୍ଟିର ଆରକ୍ଷୀ 

କହିଦିଅ ମୋତେ ଥରେ,

ଚକାଆଖି ବହି ଦିଶୁ କିବା ନାହିଁ

କରୋନାରେ ପୃଥ୍ଵୀ ଥରେ !

ତଥାପି ନୀରବ କେମିତି ତୁମେ

ସୃଷ୍ଟି ବିନାଶର ଭିନ୍ନ ଏକ ଖେଳ

ଖେଳୁଛକି ଧ୍ବଂସ ନାମେ ?

ଆହେ ଚକାଆଖି.... (1)

ଜୀବନ ଖେଳୁଛି ଏଠି

ମୃତ୍ୟୁ ସହ ଚକା ଭଉଁରୀର ଖେଳ,

ଗଡୁଛି ଶ୍ମଶାନେ ପୁଣି 

ଲକ୍ଷ ଲକ୍ଷ ମଣିଷଙ୍କ ମୁଣ୍ଡ ମାଳମାଳ !

ଛାମୁ ଦରଶନୁ ବଞ୍ଚିତ ଭକତେ

ଭକତଙ୍କ ଦୁଃଖ ଦେଖୁଛ କେମନ୍ତେ

ଡାକ ପଡୁଅଛି ମଣିମା ମଣିମା

ଶୁଣି କି ପାରୁନ ଜମା ?

ଆହେ ଚକାଆଖି...... (2)

ମହାମାରୀ ଲଙ୍ଘେ ସ୍ଥଳକୂଳ ଜଳ 

ଜୀବନ ଜୀବିକା ସବୁ ଅସମ୍ଭାଳ

କାନ୍ଧ ମିଳୁନାହିଁ ଶ୍ମଶାନ ନେବାକୁ

ଶବ ଏଠି ସଢ଼େ ରୋଗ ବାଣ୍ଟିବାକୁ !

ଆହେ ଚକାଆଖି ସୃଷ୍ଟିର ଆରକ୍ଷୀ

ଶରଣେ ଗଲୁ ତୁମରି,

ଚକ୍ର ଆଢ଼ୁଆଳେ ରଖ ଆହେ ହରି

ସୃଷ୍ଟିର ମହତ ଶିରୀ !

ଆହେ ଚକାଆଖି......(3)

ନହେଲେ ହୋଇବ ଜନଶୁନ୍ୟ ଏଇ

ସବୁଜ ସୁନ୍ଦର ଧରା,

ଅଳି କରିବାକୁ କେହି ନ ରହିବେ

ଚକାଆଖି...

ତୁମେ ଥିବ ଏକା ପରା !

ଆହେ ଚକାଆଖି....(4)