ଯୌଥ ପରିବାର

ଗାଁ ଟି ମୋହର ଅତୀବ ସୁନ୍ଦର

   ତା ମଧ୍ୟେ ମୋ ମାଟି ଘର,

ସ୍ନେହ ଆଦରରେ ବାନ୍ଧିଛି ସଭିଙ୍କୁ

   ଯୌଥ ଆମ ପରିବାର ।

ସକାଳରୁ ସଞ୍ଜ ଲାଗେନାହିଁ ଏକା

  ଚଳୁ ଆମେ ମିଳିମିଶି,

ଜଣେ ଆନ ପାଇଁ ତତ୍ପର ରହନ୍ତି

  ଦିବା ହେଉ ଅବା ନିଶି ।

ଜେଜେବାପା ଘର ମୁଖିଆ ଅଟନ୍ତି

    ସଭିଙ୍କର ସିଏ ଇଷ୍ଟ,

ପରିବାରେ ସିଏ ପଥ ପ୍ରଦର୍ଶକ

   ଲାଗେନାହିଁ କିଛି କଷ୍ଟ ।

ନୀତି ପରମ୍ପରା ଧର୍ମ ଓ ସଂସ୍କୃତି

   ସର୍ବେ କରନ୍ତି ଆଦର,

ସ୍ନେହ ଶ୍ରଦ୍ଧା ଶାନ୍ତି ମୂଳଦୁଆ ଆମ

   ଜାଣିଛୁ ତାହାର ବେଭାର ।

ମୁଁ ଶବଦଟି ଆସେନାହିଁ ମୁହେଁ

   ବ୍ୟବହାର ହୁଏ ଆମେ,

ଯୌଥ ପରିବାରେ ଜୀଇଁଛୁ ଖୁସିରେ

    ବାନ୍ଧିଣ ସଭିଙ୍କୁ ପ୍ରେମେ ।