ତୁମେ ଆସିଲ କି ବର୍ଷା

ପାରଦ ଖସୁଛି ତଳକୁ ତଳକୁ,

ପାଗ ଲାଗେ ଥଣ୍ଡା ଥଣ୍ଡା ।

ତରୁ ଲତା ସବୁ ହେଲେ ପଲ୍ଲବିତ,

ସବୁ ଜିମା ହୁଏ ଦଣ୍ଡା ।।

ଧରା ପିନ୍ଧେ ଶାଢୀ ସବୁଜ ରଙ୍ଗର,

ନଭରେ ବାଦଲ ଭାସେ ।

ଚଷାପୁଅଟିଏ ଗଗନକୁ ଚାହିଁ,

କାହିଁକି ମୁରୁକି ହସେ ?

ଜଗା ବାହାରିଲା ମାଉସୀ ଘରକୁ,

ଖାଇବାକୁ ପୋଡପିଠା ।

ସୌଦାମିନୀ ଦେଖି ତମସା ରାଣୀ ଯେ,

ହେଉଅଛି ହଟହଟା ।।

କେକୀ ନାଚିଲାଣି ପୁଚ୍ଛକୁ ମେଲେଇ,

ମଣ୍ଡୁକ ଦେଲାଣି ଡାକ ।

କାହାର ସ୍ପର୍ଶରେ ଭିଜୁଛି ଅବନୀ,

ସୁଗନ୍ଧ ବାରୁଛି ନାକ ?

ଇନ୍ଦ୍ରଧନୁ ପୁଣି ଆକାଶରେ ଆଜି,

କାହିଁକି ପାଉଛି ଶୋଭା ?

କାହା ଆଗମନେ ପ୍ରକୃତିର ରୂପ,

ଆଜି ଏତେ ମନଲୋଭା ?

ଏବେ ଏବେ ଦେଖ ଗ୍ରୀଷ୍ମ ବାହୁଡିଲା,

ସେ ପୁଣି କରୁଛି ଈର୍ଷା ।

ଟାଙ୍ଗରା ଭୂଇଁଟା ହସେ ଖିଲିଖିଲି,

ତୁମେ ଆସିଲ କି ବର୍ଷା ?

ବୀରେନ୍ କୁମାର ବେହେରା (ପୋଷାଇ , ମହାକାଳପଡା, କେନ୍ଦ୍ରାପଡା)

[e-mail]

Ph-7381978439