ଟିକି ଚଢେଇ

ଟିକି ଚଢେଇ ମୁଁ ଟିକି ମୋ ଡେଣା

          ଉଡେ ମୁଁ ଆକାଶେ ମାନେନା ମନା ।

ଟିକି ଆଖିରେ ମୁଁ ଦୁନିଆ ଦେଖେ

         ଭଲ ମନ୍ଦ ସବୁ ନିତି ପରଖେ  ।

ଉଡି ଉଡି ମୁଁ ଯେ ଦିଏ ବାରତା

         ଭାଇଚାରା ଭାବ ପୁଣି ଏକତା  ।

ଶାନ୍ତି ସ୍ଥିରତାର ମନ୍ତ୍ର ଶୁଣାଏ

         ଭଲବାଟ ନିତି କେତେ ଦେଖାଏ ।

ଟିକି ମନ ମୋର ଆକାଶ ଛୁଏଁ

         ହିଂସା କପଟ ମୋ ପାଖେ ନ ଥାଏ ।

ସଭିଏଁ ମୋଅର ଭଉଣୀ ଭାଇ

        ନିତି ଉଡୁଥାଏ ଗୀତ ମୁଁ ଗାଇ ।

ହସି ଖେଳି ନାଚି ଦିନ କଟାଏ

        କାହାରି ମନରେ ଦୁଃଖ ନ ଦିଏ ।

ସକାଳ ସୂରୁଜ କଅଁଳ ଖରା

        ମନେ ମୋ ଭରଇ ଭାବ ନିଆରା ।

ନୀଳ ଗଗନର ମୁଁ ଟିକି ତାରା  

        ଟିକି ଦେହ ମୋର ନ ଦିଏ ଧରା ।

ଟିକି ମନେ ମୋର ଉଚ୍ଚ ଭାବନା

        ନିଜ ପର ଭାବ ମୋତେ ଅଜଣା ।

ମାନ ଅଭିମାନ ପାସୋରୀ ଦେଇ

       ହସ ଖୁସି କେତେ ନିତି ବାଣ୍ଟଇ ।