ତୋ' ଓଠର ଖିଏ ହସ

ଦିନରୁ ରାତି ଯାଏଁ

ସମୟ ନଥାଏ ନେବାକୁ

ଶାନ୍ତିରେ ଟିକେ ନିଶ୍ୱାସ

ସମୟର ବରାଦ ଅନୁସାରେ

ଜିତିବାକୁ ହୁଏ ସବୁରି ବିଶ୍ୱାସ

କେବେ ଧଇଁସଇଁ ହୋଇ

ଦୌଡ଼ିବାକୁ ପଡ଼େ ଅନ୍ଧାର ଛାତିରେ

କେବେ ସୁନେଲି କିରଣ

ବିଛୁରିତ ହୁଏ ମୋ' ପଥଧାରେ

କେବେ ଯନ୍ତ୍ରଣା, କେବେ ନିରାଶା

କେବେ ସାହସ, କେବେ ବିତୃଷ୍ଣା

କେବେ ସାନ୍ତ୍ଵନାର ଉଷ୍ମତା

କେବେ ଆତ୍ମତୃପ୍ତି ପୁଣି ନୂଆ ଆଶା

ଏ ସବୁ ସାଉଁଟୁ ଥାଏ

ଦିନରୁ ରାତି ଯାଏଁ

ମୁଁ ଖୋଜେନା ସରଗର ଚାନ୍ଦ

ଲୋଡ଼େନା ପ୍ରୀତିର ପରଶ

ତଥାପି ଏ ପରିଶ୍ରମୀ

ମନ ଆଉ ହୃଦୟରେ

ବସା ବାନ୍ଧିଥାଏ ଆଶାଟିଏ

ଦେଖିବାକୁ ତୋ' ଓଠରେ

ଧାରୁଟିଏ ହସ

ତୋ'ର ସେ ଖିଏ ହସ

ଭରିଦିଏ ମୋ' ମନରେ ଅଜସ୍ର ଆତ୍ମବିଶ୍ୱାସ

ଜାଳିଦିଏ ମୋର ସବୁ ଅଭିମାନ, ଅବଶୋଷ

ତୋ'ର ସେ ଖିଏ ହସ

ଯୋଡ଼ିଦିଏ ମୋ' ଓଠରେ

ଅଉ ଖିଏ ହସ

ତୋ'ର ସେ ଚେନାଏ ହସ

ମୋ' ପାଇଁ ତ ପୁଳାଏ ଆକାଶ !