ସୁନା ଭଉଣୀ

ସୁନା ଭଉଣୀ ମୋ ଯାଆନା ରୁଷି

ସରଗ ଶଶୀ ଉଏଁ ତୁ ଦେଲେ ହସି

ତୋହରି ଖୁସି

ସାରା ଜୀବନକୁ ଖିଆଲ ରଖିବି କଥା ଦେଉଛି।

ତୁ ଯେବେ ଯିବୁ ତୋ ଶାଶୁଘର

ମୋତେ କରିବୁ ନାହିଁ ଲୋ ପର

ଟୋପିଏ ସ୍ନେହ

ଝରିବ ମୋ ଆଖିରୁ ରକତ ହୋଇ ଲୁହ।

ରାକ୍ଷୀ ବରଷକ ଆସିବ ଯେବେ

ଚାହିଁଥିବି ତୋର ବାଟକୁ ତେବେ

ମନଟି ଖୋଜିବ

ହୃଦୟ ଉଛୁଳି ଖୋଜିବ ତୋହରି ମୁହଁ।

ଆସିବୁ ଯେବେ ମୋ ମନ ହସିବ

ନ ଆସିଲେ ମନ ଊଣା ହୋଇବ

ତୁ ତ ପରାଧୀନ

ନ ଆସିଲେ କରିବିନି ଜମା ତୋ ଉପରେ ମାନ।

ସାରା ସଂସାରକୁ କହିବି ମୁହିଁ

ତୁ ମୋ ଭଉଣୀ ମୁଁ ତୋ ଭାଇ

ଗୋଟିଏ ନାହିର

ଆମେ ପରା ଦୁଇ ନାଡ଼ ଆମ ମାଆର।