ସତରେ କଣ ମୋଦେଶ ସ୍ଵାଧୀନ ହେଇଛି !!
ସତରେ କଣ ମୋଦେଶ ସ୍ଵାଧୀନ ହେଇଛି !!
୭୪ତମ ସ୍ଵାଧୀନ ଦିବସ
ସାରା ଦେଶ ଆଜି ପାଳୁଛି ।
ଦୂର ଆକାଶରେ ତ୍ରିରଙ୍ଗା ପତାକା
ଫରଫର ହୋଇ ଉଡୁଛି ।
ପତାକା ଉଡ଼ାଇ ଖୁସି ମନେ ଆଜି
ସେଓ ବୁନ୍ଦିଆ ମୁଁ ଖାଉଛି ।
ହେଲେ ସତରେ କଣ
ମୋଦେଶ ସ୍ଵାଧୀନ ହେଇଛି ।।୧।।
ମୋ ଦେଶର ଝିଅ ଦିନ ଦ୍ୱିପହରରେ
ଏକା ଯିବା ପାଇଁ ଡରୁଛି ।
ମୋ ଦେଶର ପୁଅ ବିଦେଶକୁ ଯାଇ
ଆଜି ବି ଦାଦନ ଖଟୁଛି ।
ଗୋରା ସରକାର ମୋ ଦେଶକୁ ଛାଡି
ସ୍ଵଦେଶକୁ ଚାଲି ଯାଇଛି ।
ହେଲେ ସତରେ କଣ
ମୋ ଦେଶ ସ୍ଵାଧୀନ ହେଇଛି ।।୨।।
ମୋ ଦେଶର ବୋହୂ ଯୌତୁକ ପାଇଁ
ନିର୍ଯ୍ୟାତିତା ହେଇ ମରୁଛି ।
କନ୍ୟା ଭୃଣ ହତ୍ୟା ଖୁଲମ୍ ଖୁଲ୍ଲା
ଆଜି ବି ମୋ ଦେଶେ ଚାଲିଛି ।
ମୋ ଦେଶର ଝିଅ ପାଇବାକୁ ଶିକ୍ଷା
ଆଜି ବି ବଞ୍ଚିତ ହେଉଛି ।
କୁହ ସତରେ କଣ
ମୋ ଦେଶ ସ୍ଵାଧୀନ ହେଇଛି ।।୩।।
ଦେଶେ ନାଗରିକ ଓଳିଏ ଖାଇଲେ
ଓଳିଏ ଉପାସେ ଶୋଉଛି ।
ଦେଶର ଶାସକ ଦାମୀ ଗାଡ଼ି ଧରି
ବ୍ରହ୍ମାଣ୍ଡକୁ ବୁଲି ଯାଉଛି ।
ନ୍ୟାୟ ପାଇବାକୁ ବର୍ଷ ବର୍ଷ ଧରି
ଜନତା ଅପେକ୍ଷା କରିଛି ।
କୁହ ସତରେ କଣ
ମୋ ଦେଶ ସ୍ଵାଧୀନ ହେଇଛି ।।୪।।
ଦେଶର ରକ୍ଷକ ଲାଞ୍ଚ ନେଇ ଆଜି
ଭକ୍ଷକ ସାଜି ଯାଉଛି ।
ରାଜସ୍ୱ ନାଆଁରେ ମୋ ଦେଶରେ ପୁଣି
ବେଆଇନ୍ କାମ ଚାଲିଛି ।
ମୋ ପାଇଁ ପରା ସ୍ଵାଧୀନତା ଆଜି
ପ୍ରଶ୍ନବାଚୀଟିଏ ସାଜିଛି ।
କୁହ ସତରେ କଣ
ମୋ ଦେଶ ସ୍ଵାଧୀନ ହେଇଛି ।।୫।।