ସତେ କଣ ମୁଁ ବୁଢ଼ା ହେଲିଣି

ଚାଲିଗଲେ ଟିକେ ଥକି ପଡୁଛି ମୁଁ

ଆଗପରି ଆଉ ବଳ ପାଉନି

ବେଶିଦିନ ଆଉ ବଞ୍ଚିବିନି ବୋଧେ

ନିଶ୍ୱାସ ନେବାରେ କଷ୍ଟ ହେଲାଣି

ସତେ କଣ ମୁଁ ବୁଢ଼ା ହେଲିଣି ?

ଚଷମାକୁ ଯେତେ ବଦଳେଇଲେ ବି

ଆଖିକୁ ମୋ ଆଉ ଭଲ ଦିଶୁନି

ବଡ଼ ପାଟିକରି କହିଲେ ବି କେହି

କାନକୁ ମୋ ଆଉ ଭଲ ଶୁଭୁନି

ସତେ କଣ ମୁଁ ବୁଢ଼ା ହେଲିଣି ?

ରାଗୁଥିଲି ଆଗେ ଯେଉଁ କଥା ଶୁଣି

ଏବେ ସବୁ ଅଣଦେଖା କଲିଣି

କାହାରି ଉପରେ ରାଗିବାକୁ ଏବେ

ଛାତିରେ ଛାନିଆ ପଶିଗଲାଣି

ସତେ କଣ ମୁଁ ବୁଢ଼ା ହେଲିଣି ?

ମନ ଭିତରର କୋହ ଯେତେ ସବୁ

ଆଖି ଲୁହ କରି ନିଗାଡ଼ିଲିଣି,

କେହି ପଚାରିବା ଆଗରୁ କହୁଛି

ଆଖି ମୋ ଖରାପ ହୋଇଗଲାଣି,

ସତେ କଣ ମୁଁ ବୁଢ଼ା ହେଲିଣି ?

ମୁ୍ହଁ ଟାଣ ମୋର କମ ନୁହେଁ 

ହେଲେ ଶରୀରର ଆଉ ବଳ ପାଉନି

ଭିତରେ ଭିତରେ ଘୁଣ ଖାଇଲେଣି

ମନଟା ଦୁର୍ବଳ ହୋଇଗଲାଣି

ସତେ କଣ ମୁଁ ବୁଢ଼ା ହେଲିଣି ?

ଭୁଲ କରିବାଟା ସ୍ୱାଭାବିକ 

ଯେଣୁ ବୟସଟା ମୋର ବଢ଼ିଗଲାଣି

ଭୁଲ ପ୍ରାୟଶ୍ଚିତ କରିବା ପାଇଁକି

ମନେ ଅନୁତାପ ଏବେ କଲିଣି

ସତେ କଣ ମୁଁ ବୁଢ଼ା ହେଲିଣି ?

ସର୍ବେ ନିଜ ନିଜ ଅଭିନୟ ସାରି

ସଂସାରରୁ ଦିନେ ନେବା ମେଲାଣି

ଚାଲୁ ଚାଲୁ ଚାଲିଯାଆନ୍ତି କି ମୁହିଁ

ଏବେ ଠାରୁ କାହିଁ ମନ ହେଲାଣି

ସତେ କଣ ମୁଁ ବୁଢ଼ା ହେଲିଣି ?