ଷଷ୍ଠୀ ଦେଵୀ ଓଷା
ଷଷ୍ଠୀ ଦେଵୀ ଓଷା
ଭାଦ୍ରବର ଶୁକ୍ଳ ଷଷ୍ଠି ତିଥି ଆଜି
ପୂଜନ୍ତି ଷଠୀ ଦୁଷେଇ
ସୁତିକା ଗୃହର ଇଷ୍ଟଦେବୀ ମାତା
ରଖନ୍ତି ଘଣ୍ଟ ଘୋଡେ଼ଇ
ବାରମାସେ ତେର ଓଷା ଯେ କରନ୍ତି
ଓଡ଼ିଶାର ମାଆ ମାନେ
ଷଠୀ ଦେବୀ ପୂଜା ଯତନେ କରନ୍ତି
ମାନସିକ ରଖି ମନେ
ଶରତ କୋଳରେ ଭୋଦୁଅ ବିଭୋର
ପାରୁନି ମୁହୂର୍ତ୍ତେ ଛାଡ଼ି
ଭାଦ୍ର ମାସରେ ରିମ୍ ଝିମ୍ ବରଷା
ଲଘୁଚାପ ଆଣେ ଭିଡ଼ି
ଷଠୀଦେବୀ ହସେ ଶୀଳପୁଆଦେହେ
ଦେହରେ ହଳଦୀନାଇ
କଉଡ଼ିରେ ହସେ ଦୁଇଗୋଟି ଆଖି
କି ସୁନ୍ଦର ଦିଶୁଥାଇ
ପିଲାଙ୍କୁ ବସାଇ ଷଠୀଦେଵୀ ପାଶେ
ପୂଜାର୍ଚ୍ଚନା କରା ହୁଏ
ମଙ୍ଗଳ କାମନା କରିକି ମାଆ ଯେ
ଉପବାସ କରିଥାଏ
ଛଅଟି ଗଛରେ ବିଡା ବନ୍ଧାଯାଏ
ବଜ୍ରମୁଳି ସାରୁଗଛ
ବାଉଁଶର ପତ୍ର ବରକୋଳି ଆଦି
ଦୁବଘାସ ଧାନଗଛ
ଛଅଡାଳେ ଵନ୍ଧା ଡାଳରେ ଝାଡିକି
ସନ୍ତାନକୁ ବଜ୍ର କରି
ଷଷ୍ଠୀ ଦେଵୀ ପାଶେ ଶରଣ ପଶଇ
ଝରି ପଡୁ ସୁଧାବାରି
ମାଆ ମମତାରେ ହସେ ଏ ସଂସାର
ଚରଣେ ତୋର ଜୁହାର
ମାଆ ଷଠିବୁଢ଼ୀ ହୋଇଥାଲୋ ସାହା
ତୋପାଇଁ ସୁନ୍ଦର ଘର
ଜୟ ଜୟ ମାତା ଷଷ୍ଠୀ ଦେଵୀ ଲୋ
ଶିଶୁଙ୍କ ମଙ୍ଗଳକାରୀ
କରୋନାରୁ ଘଣ୍ଟ ଘୋଡେ଼ଇ ରଖିବୁ
ଅଭୟ ପ୍ରଦାନ କରି
ମାଆ ଷଠୀଦେବୀ ସାହା ହୋଇଥିବୁ
ରଖିବୁ ପଣତ ତଳେ
ସଭିଙ୍କ ଜୀବନେ ମା' ଭରିଦେ ଖୁସି
ଶରଣ ତୋ ପାଦ ତଳେ ।