ସରୂ ଚକୁଳି

ମଉସା ନେଉଳି  ଧରିଛନ୍ତି ଥାଳି

ଖାଇବେ ସରୁ ଚକୁଳି,

ଚୁଲି ପାଖେ ବସି କରିବେ ମାଉସୀ

ପତଳା ଧଳା ଚକୁଳି ।

ପୂର୍ବ ଦିନ ଠାରୁ ବିରି ଓ ଚାଉଳ

ସହିତ ମେଥି ପକାଇ,

ଜଳ ଢାଳି ସବୁ ଗୋଟିଏ ବାସନେ

ରହିଅଛି ଭିଜା ହୋଇ ।

ସେହି ସବୁ ଦ୍ରବ୍ୟ ମାଉସୀ ମିଶାଇ

ଯନ୍ତ୍ର ଶିଳେ ବାଟିଦେବ,

ଖାଇବା ସୋଡାରୁ ଚିମୁଟାଏ ନେଇ

ତହିଁ ମିଶ୍ରଣ କରିବ ।

କିଛି କ୍ଷଣ ପରେ ପିଠଉ ଫୁଲିବ

ମାଉସୀ କରିବ ପିଠା,

ଇତି ଅବସରେ କରି ଦେବ ସିଏ

ବାଦାମ ନଡ଼ିଆ ବଟା । 

ବାଦାମ ବଟା ଓ ନଡ଼ିଆ ଚଟଣୀ

ଚକୁଳି ସହିତ ଥାଏ,

ତା'ର ସ୍ଵାଦ କେବେ ଛାଡ଼େନି ପାଟିରୁ

ତାହା ଯଦି ଜଣେ ଖାଏ ।

ଚକୂଳି ହୋଇବ ଧୋବ ଫର ଫର

ପତଳା କାଗଜ ଭଳି,

ସ୍ଵାଦିଷ୍ଟ କରିବ ପିଠା ପୁଣି ଆଉ

ଦେଲେ ମେଞ୍ଚେ ତେଲ ବୋଳି ।

ଟାକୁ ଟାକୁ କରି ଚଟଣୀ ସହିତ

ଚକୁଳି କୁ ଦେଲେ ଖାଇ

ପିଲାମାନେ ସବୁ ମଉସା ମୁହଁକୁ

ଚାହିଁଲେ ତଟସ୍ଥ ହୋଇ ।