ସଫଳ ମୋ ମତଦାନ
ସଫଳ ମୋ ମତଦାନ
ମୋ ଦେଶରେ ଯେବେ ହେଲା ନିର୍ବାଚନ,
ମତଦାନ କଲେ ସର୍ବେ ।
ମୋ ପ୍ରିୟ ନେତାକୁ ବାଛିଥିଲି ମୁହିଁ,
ଛାତି ମୋ ଫୁଲିଲା ଗର୍ବେ ।।
ଯାହାଙ୍କ ନାମକୁ ଶୁଣିଦେବା ମାତ୍ରେ,
ଆତଙ୍କି ପଳାନ୍ତି ଛାଡି ।
ତାଙ୍କର ହସ୍ତରେ ସମର୍ପିଥିଲି ମୁଁ,
ଦେଶ ଶାସନର ବାଡି ।।
ଯାହାଙ୍କୁ ମୋ ମନ ବାଛିଥିଲା ନେତା,
ସେ ହେଲା ଦେଶର ରାଜା ।
ବିରୋଧୀଏ ସବୁ ଦେଲେ ଛତ୍ରଭଙ୍ଗ,
ସୁଖରେ ରହିଲେ ପ୍ରଜା ।।
ଏବେ ମୁଁ ଭାବୁଛି ମୋ ମତକୁ ବୋଧେ,
ସମର୍ଥନ ଦେଲା ଦେଶ ।
ସବୁ କଳ୍ପନାର ଅନ୍ତ ହେଲା ଆଜି,
ଭିନ୍ନ ମତ ହେଲା ଶେଷ ।।
ମୋ ମତାମତ ହୋଇନି ବିଫଳ,
ପ୍ରମାଣିଲେ ସର୍ବଜନ ।
ଧନ୍ୟ ମୋର ମତ ଧନ୍ୟ ଦେଶବାସୀ,
ସଫଳ ମୋ ମତଦାନ ।।