ସଞ୍ଜ ବତୀ

ସକାଳୁ ସକାଳୁ ନିତି ଘର ଅଗଣା ହୁଏ ଛେରା ପହରା,

ଖାଲି ଆମ ଘରେ ନୁହେଁ , ସମସ୍ତଙ୍କ ଘରରେ ଆମ ଗାଁ ସାରା ।

ଉଠି ସଅଳ ସଅଳ, ଧରି ଦାନ୍ତ କାଠି ନୂଆ ବୋହୂ ଆମ

ଚାଙ୍ଗୁଡାରେ ଫୁଲ ଭରେ ମଲ୍ଲୀ, ମାଳତି ଓ ଅନେକ କୁସୁମ ।

ଫୁଲ ଚାଙ୍ଗୁଡା ଥୋଇ, ବଟା ହଳଦି ନେଇ ଯାଏ ସେ ଗାଧୋଇ,

ସାବୁନ ମାଖି ସ୍ନାନ ବେଳେ ଚୁଡି ବାଜିଲେ ଯାଏ ସେ ଲାଜେଇ ।

ଶୁଖାଇ ଓଦା ବସ୍ତ୍ର, ସୁଲକ୍ଷିଣୀ ଭରଇ ସୀମନ୍ତେ ସିନ୍ଦୁର,

ଧୂପ, ଦୀପ, ଅର୍ଘ୍ୟ ଦେଇ ଚଉରା ମୂଳରେ କରେ ନମସ୍କାର ।

ଗୋଧୂଳି ବେଳେ ସଳିତା ଲଗାଏ ବତୀରେ ଗୁଆଘିଅ ଦେଇ,

ନିତି ଜଲାଏ ସଞ୍ଜ ବତୀ ଚଉରା ମୂଳେ ହାତ ଗୋଡ ଧୋଇ ।

ଚାରି ଆଡେ ଅନ୍ଧାର ରାଜୁତି ସୁଲକ୍ଷିଣୀ ଚଉରା ମୂଳରେ

ଝଲସୁ ଥିଲା ବୋହୂ ର ଗୋରୀ ମୁହଁ ସଞ୍ଜବତୀ ଆଲୁଅରେ ।