ସଞ୍ଜ ଆସେ ନଇଁ ନଇଁ

ସଞ୍ଜ ଆସେ ନଇଁ ନଇଁ ଲୋ ବଉଳ

       ସଞ୍ଜ ଆସେ ନଇଁ ନଇଁ ।

ଦୂର ଦିଗବଳୟେ ତପନ ଲୋ ବଉଳ

      ନିଜକୁ ଦେଲେ ଲୁଚାଇ ।।

ନୀଡ଼ ଲେଉଟାଣି ବେଳ ଲୋ ବଉଳ

      ଚଞ୍ଚଳତା ଭରି ପ୍ରାଣେ ।

କୋଳାହଳପୂର୍ଣ୍ଣ ରାସ୍ତାଘାଟ ଲୋ ବଉଳ

      କ୍ଷିପ୍ରବେଗେ ପାଦ ଚଳେ ।।

ଦେଉଳୁ ଶୁଭଇ ଘଣ୍ଟଘଣ୍ଟା ଲୋ ବଉଳ

      ଭକ୍ତି ଭରି ସର୍ଵ ପିଣ୍ଡେ ।

ବଛାଘେନି ଧେନୁ ଲେଉଟନ୍ତି ଲୋ ବଉଳ

     ଧୂଳି ଉଡାଇଁଣ ଦାଣ୍ଡେ ।।

ନିଶିକୋଳେ ଲୋଟଇ ସଞ୍ଜ ଲୋ ବଉଳ

     ଦିନ ଅବସାନ ହୁଏ ।

ଯାମିନୀ ନିଶା ବଢିବଢ଼ି ଯାଏ ଲୋ ବଉଳ

      ନିଦ୍ରାତ କୋଳେଇ ନିଏ ।।

କ୍ଷିତିରେବିରାଜେ ଘୋର ନିଶବ୍ଦତା ଲୋ ବଉଳ

     ସମୟ କି ଥମି ଯାଏ ।

ନବପ୍ରଭାତର ଶୀତଳ କିରଣ ଲୋ ବଉଳ

    ସଜଉନ୍ମାଦନା ଭରି ଥାଏ ।।