ସନ୍ତାନକୁ ପଦେ
ସନ୍ତାନକୁ ପଦେ
ତୁମପାଇଁ
ଦୁନିଆର ବୋଝ ଉଠାଉ ଉଠାଉ
ଆମେ ଦୁନିଆର ବୋଝ ପାଲଟିଗଲୁ,
ହେଲେ ତୁମେ ଆମ ପାଇଁ
କେବେବି ବୋଝତ ନଥିଲ,
ତୁମେ ଆମପାଇଁ ଦୁନିଆର
ସବୁଠାରୁ ଅମୂଲ୍ୟ ସମ୍ପଦ ଥିଲ,
ହେଲେ ଅବଶେଷେ
ଆଜି ଆମେ ତୁମ ବୋଝ ପାଲଟିଗଲୁ ।
ଏ ବୋଝ ତୁମେ ଉଠାଇବ
ଅବା ରାସ୍ତାକଡ ଅଳିଆଗଦାରେ
ଫୋପାଡି ଚାଲିଯିବ
ସେ ନିର୍ଣ୍ଣୟ ତୁମପାଇଁ ଛାଡିଦେଲୁ ।
ତାକୁ କରଜ ଭାବିବନି,
ତୁମ ପାଇଁ ଆମେ ଯାହାବି କରିଲୁ
ସେ ଆମର କର୍ତ୍ତବ୍ୟ ତ ଥିଲା
ଦୁନିଆରେ ତୁମେ ମୁଣ୍ଡଟେକି ଚାଲିବ
ତୁମପାଇଁ ଆମେ
କେତେ କେତେ ସ୍ୱପ୍ନ ଦେଖିଥିଲୁ ।
ଆମେ ଆମ କର୍ତ୍ତବ୍ୟ କରିଲୁ
କିନ୍ତୁ ତୁମେ ତୁମ କର୍ତ୍ତବ୍ୟ କରିବ
ଅବା ଫାଙ୍କିଦେଇ ଚାଲିଯିବ
ସେ ନିର୍ଣ୍ଣୟ ତୁମପାଇଁ ଛାଡିଦେଲୁ ।
ଯେତେ ତୁମ ଅଳି ଅଝଟ ରାଗ ରୁଷା
ତୁମ ଭୁଲ ଠିକ୍ ସବୁ କିଛି
ହସି ହସି ସହିଗଲୁ,
ତୁମର ପ୍ରତିଟି କଥାକୁ ଶୁଣିଲୁ,
ଯେତିକି ସମ୍ଭବଥିଲା ସବୁ ପୁରା କଲୁ
ଆଜି ଆମକଥା ଶୁଣିବାକୁ
ତୁମ ପାଖେ ଦି'ଘଡି ସମୟ ଥିବ
ଅବା ସମୟର ଅଭାବ କହି
ତୁମେ ମୁହଁ ମୋଡି ଚାଲିଯିବ
ସେ ନିର୍ଣ୍ଣୟ ତୁମପାଇଁ ଛାଡିଦେଲୁ ।
କାଲି ଆମେ ଯାହାବି ଦେଇଥିଲୁ
ସେ ଆମ ସ୍ନେହ ମମତା
ଆଉ ଆମ ପ୍ରେମ ଉପହାର ଦେଲୁ ।
ତୁମକୁ ସବୁଦେଇ ତୁମ ଖୁସିଠାରୁ
ଆମେ ଅଧିକ ଖୁସି ହୋଇଥିଲୁ,
ତୁମ ମୁହଁରେ ହସଟିକେ ପାଇଁ
ସବୁକିଛି କରିଗଲୁ,
ସେ ସବୁ ଆମ ପ୍ରେମ ଥିଲା ।
ଆଜି ଆମେ ତୁମ ଦୟାର ଭୀକାରି ସାଜିଲୁ
ତୁମେ ଦୟା କରିବ ଅବା ସମ୍ମାନ ଦେବ
ସେ ନିର୍ଣ୍ଣୟ ତୁମପାଇଁ ଛାଡିଦେଲୁ ।