ସଂଶୋଧନର ବାଟ

ମଣିଷ ମାତ୍ରକେ ଭୁଲ୍ ରହିଥାଏ

ଏ କଥାଟି ସମସ୍ତେ ଅଛୁ ଜାଣି,

ଅସଲ ମଣିଷ ଅଟଇଟି ସିଏ

ସୁଧାରି ନିଏ ଯେ ଭୁଲ୍ ସେକ୍ଷଣି ।। ୧

ଆଗ ପଛ କରି ଦୁଇ ଗୋଟି ଭାର

ବହିଥାଉ ଆମେ ନିଜ କାନ୍ଧରେ,

ଆଗ ଭାରେ ରଖି ଅନ୍ୟର ଦୋଷକୁ

ଦର୍ଶାଇ ଥାଉ ଅତି ଆନନ୍ଦରେ ।। ୨

ନିଜ ଦୋଷ ସବୁ ପଛ ଭାରେ ଥୋଇ

ଦୃଷ୍ଟି ଆଢ଼ୁଆଳେ ସର୍ବଦା ରଖୁ,

ଅନ୍ୟ କେହି ଯଦି ଦେଖାଇ ଦିଅଇ

ଅସହ୍ୟ ଦୃଷ୍ଟିରେ ତାକୁ ନିରେଖୁ ।। ୩

ଭୁଲି ଯାଇ ଥାଉ ନିଜର ଭୁଲ୍ କୁ

ସାହସ କରି ଯେ ଦର୍ଶାଇ ଥାଏ,

ସିଏ ହିଁ ନିଜର ହିତ ଚାହୁଁ ଅଛି

ଏ କଥା କେବେ ବି ଦ୍ବିମତ ନୁହେଁ ।। ୪

ନିଜ ଲୋକ ସଦା ସୁଧାରି ଦିଅନ୍ତି

ଆମ ଦ୍ଵାରା ହୋଇଥିବା ଭୁଲ୍ କୁ,

ତେଣୁ ତାଙ୍କ କଥା ମନରେ ନ ଧରି

ସୁଧାରି ନେବା ହେ ନିଜେ ନିଜକୁ ।। ୫

ଭୁଲ୍ କରି ଯେବେ ସଂଶୋଧନ ପାଇଁ

କୁଣ୍ଠିତ ହୋଇବା ଆହ° ସ୍ୱଭାବେ,

ଭୁଲ୍ ବୋଲି ପ୍ରମାଣିତ ହୋଇ ଯିବା

ଠିକ୍ ବାଟ ଦେଖା ଯିବନି କେବେ ।। ୬

ଭୁଲ୍ ଠିକ୍ ର ଏ ସଂସାର ଭିତରେ

ସଂଶୋଧନ ବାଟ ଅନେକ ଅଛି,

ନିଜକୁ ସୁଧାରି ଆଗେଇଲେ ବାଟ

ଅସୁବିଧା ଆଉ ନଥିବ କିଛି ।। ୭