ସଂସାର ବନ୍ଧନ

ତ୍ରିଗୁଣ ରଜ୍ଜୁରେ ବନ୍ଧା ହୋଇ ଜୀବ

ସଂସାର ବନ୍ଧନେ ରହି

ସକଳ କରମ କରୁଛି ସର୍ବଦା

ଫଳ ଲାଭ ଆଶା ନେଇ ।

ବଦ୍ଧ ଜୀବ ଗୋଟି ଉପାୟ ପାଏନା

କାଟି ସଂସାର ବନ୍ଧନ

କିପରି ସମ୍ମୁଖ ହେବ ହରିଙ୍କର

କିପରି ଲଭିବ ଜ୍ଞାନ ।

କାମ କ୍ରୋଧ ଲୋଭ ଏହି ତିନି ସିନା

ସଂସାର ବନ୍ଧନେ ବାନ୍ଧେ

ଏ ତିନିକୁ କାଟି ସଂସାରେ ସାଧକ

ନିଜର ସାଧନା ସାଧେ ।

ସଂସାର ବନ୍ଧନ ଅତ୍ୟନ୍ତ କଠିନ

ଫିଟିବା ବଡ ଦୁରୂହ

ତୀବ୍ର ଉତ୍କଣ୍ଠିତ ହରି ପଦ ପ୍ରାପ୍ତି

ପାଇଁ ବଢିଲେ ଉତ୍ସାହ ।

ଭଗବାନ ନିଜେ ଆଗଭର ହୋଇ

ଗୁରୁଙ୍କୁ ପାଶେ ପଠାନ୍ତି

ଗୁରୁଙ୍କ ଆଶ୍ରିତ ହୋଇଲେ ସୁଶିଷ୍ୟ

କଟେ ଭବ ବନ୍ଧ ଭୀତି ।

ଗୁରୁଙ୍କ ହୃଦରେ ବସନ୍ତି ଗୋବିନ୍ଦ

ସନ୍ଦେହ ନାହିଁ ଏଥିରେ

ଗୁରୁ ପଦେ ରତି ସୁଶିଷ୍ୟ କରିଲେ

ବନ୍ଧନ କଟେ ଅଚିରେ ।

ସଂସାର ବନ୍ଧନ ନିଶ୍ଚେ ହୁଏ ଦୂର

କରି ଗୁରୁ ପଦ ସେବା

ଅଭୟ ପଦରେ ଶରଣ ପଶିଲେ

ଭବ ବନ୍ଧନୁଁ ତରିବା ।

ଶରଣାଗତର ରକ୍ଷଣ ପାଇଁକି

ଗୁରୁ ଧରନ୍ତି ଶରୀର ।

ଆଶ୍ରିତ ହୋଇଲେ ନିଶ୍ଚିତ କଟିବ

ସଂସାର ବନ୍ଧନ ତୋର ।