ସଂପର୍କ

******

ମାନ ଅଭିମାନ ଭୁଲିଗଲା ମନ

ଜୀବନର ମାନେ ବୁଝି ଗଲା ପରେ ,

ଆଉ କେଉଁ ଅଂତର୍ଦାହ ଅଂତର୍ଦ୍ବଂଦ

ନିଜେ ହିଁ ନିଜକୁ ଚିହ୍ନି ଗଲା ପରେ !

ଆଉ କାହିଁପାଇଁ ଏତେ ଆଲୋଡନ

ମନୁଆ ମନକୁ ମନାଇଲା ପରେ

କାହିଁକି କାହାକୁ ଦୋଷ ଅବା ଦେବା

ନିଜ କଲା କର୍ମ ଭୋଗ କଲା ପରେ !

କାହିଁକି ବା ଆଉ କର ଘୃତ ଦାନ

ଦୀପରୁ ସଳିତି ସରିଗଲା ପରେ,

କାହିଁକି ମଉଳା ଫୁଲେ କର ମାଳା

ଗଛ ଡାଳୁ ଫୁଲ ଝରି ଗଲା ପରେ !

ସଂପର୍କ ତ ଏକ ଅଦିନ କୁଣିଆ

ଆସିଥାଏ ଘରେ ମନ କଲା ପରେ

ଆଉକି ସେ ଫେରେ ଯେତେଡାକିଲେ ବି

ଥରେ ଗୋଡ କାଢି ଚାଲି ଗଲା ପରେ !