କିଏ ସିଏ ରେ .....

*******

କିଏ ବିଂଚେ ଚୁନା ଚୁନା ସୁନା ଖରା

କେ ଝରାଇ ଦିଏ ବୁଂଦା ବୁଂଦା ବାରି

କେ ଫୁଟାଇ ଦିଏ କଂଟା ଦେହେ ଫୁଲ

କେ ଉଠାଏ ଜହ୍ନ ଆସିଲେ ଶର୍ବରୀ !

କିଏ ବୁହାଉଛି ଶୀତଳ ସମୀର

ଧୀରେ ଧୀରେ ମୃଦୁ ମଂଦ ଗଂଧ ଭରି,

କିଏ ମଲ୍ଲୀ ମାଳେ ସଜାଇ ଦେଉଛି

ମଧୁର ମାଧବୀ ରାତ୍ରିର କବରୀ !

କିଏ ବଜାଉଛି ତାରାର ସିତାର

କିଏ ନଚାଉଛି ନଦୀରେ ଲହରୀ

କିଏ ଡାକୁ ଅଛି ନଦୀ ସେପାରିରୁ

ବିଜନ ବେଳାରେ ବଜାଇ ବାଂଶୁରୀ !

କିଏ ନୀଳ ନଭେ ଉଡାଇ ବିହଂଗ

କହେ ଆସ ଯିବା ଜହ୍ନେ ଘର କରି

କଳା ମେଘ ବୁକେ ବିଜୁଳି ଚମକେ

କଳା କୁଂତଳରେ ସୁନା ଫୁଲ ପରି !

ଦୁନିଆ ଲାଗୁଛି ଚିତ୍ରପଟ ଟିଏ

କେ ରଖି ଦେଇଛି ଚିତ୍ରାଂକନ କରି

ରଂଗେ ରୂପେ ଅପରୂପ ଅନୁପମ

ସରଗ ସୁଷମା ହେବ ନାହିଁ ସରି !

ଆନଂଦ ଭବନ ଲାଗେ ଏ ଭୁବନ

ସ୍ୱର୍ଗୀୟ ସଂପଦ ରହିଅଛି ଭରି

ଦୁଃଖ ଦୈନ୍ୟ ଏଠି ଥିଲେ ବି ନଗଣ୍ୟ

ଧନ୍ୟ ଏଠି ଜୀବ ଜନ୍ମ ଲାଭ କରି !