ସକାଳ ଆସିଲେ

ସୂର୍ଯ୍ୟ ଉଇଁଲେ ସକାଳ ହେଲେ

ଅନ୍ଧାର ହଟିଯାଏ

ବସାରେ ପକ୍ଷୀ ଛୁଆକୁ ରଖି

ଆହାର ପାଇଁ ଧାଏଁ l

ପାହାଡ଼ ତଳେ ତୋଟା ଗହଳେ

ଡାଳରୁ ଡାଳ ଡେଇଁ

ଗାଁ ମୁଣ୍ଡରେ ପହଞ୍ଚିଯାଏ

ହନୁମାଙ୍କଡ଼ ଭାଇ l

ବାଡ଼ି କି ବାଡ଼ି ବୁଲିକି ସେହି

ଖାଇବ ଫଳ ମୂଳ

ଦେଖାଇ ରଙ୍ଗ ଗାରିମା କେତେ

ଲଗାଇ ସବୁ ବଳ l

କୁନି ବାଛୁରୀ ମାଆକୁ ଛାଡ଼ି

ଲାଙ୍ଗୁଡ଼ ଟେକି ଡିଏଁ

ଲାଗିଲେ କେହି କଅଁଳ ଦେହେ

ମାଆ ପାଖକୁ ଧାଏଁ l

ଗୋବର ପାଣି ମୁଁଦିଏ ଛିଞ୍ଚି

ଘରର ନୂଆ ବୋହୂ

ବାସି ଦୁଆର ଖରକି ଦିଏ

ସକାଳ ହଉ ହଉ l

ବେଳ ଘଡିଏ ହେଲାରୁ ଯାଏ

କ୍ଷେତକୁ ଚଷା ଭାଇ

ହଳ ଲଙ୍ଗଳ ସାଙ୍ଗରେ ଧରି

ପାଞ୍ଚଣ ଖଣ୍ଡେ ନେଇ l

କରିବ ଚାଷ ଫୁଟାଇ ହସ

ଆହାର ମୁଠେ ଦେବ

ସବୁରି ମୁଖେ ହରଷ ଦେଇ

ଧନ୍ୟ ସେହି ହେବ l

ବହି ବସ୍ତାନି ହାତରେ ଧରି

କୁନା ଓ ମୁନା ଯୋଡ଼ି

ହସ ଖୁସିରେ ଗାଆଁ ଦାଣ୍ଡରେ

ଯାଆନ୍ତି ପାଠ ପଢ଼ି l

ଏମିତି କେତେ ଛବି କୁ ନେଇ

ନିତି ସକାଳ ହୁଏ

କରମ କରି ଚାଲନ୍ତି ସର୍ବେ

ସଞ୍ଜ ନଇଁବା ଯାଏ l