ସଜଡ଼ା ଉଜୁଡ଼ା ସ୍ମୃତି

ସ୍ମୃତି ଯେତେବେଳେ ସୁଖର ସପନେ

ରଙ୍ଗ ଅବିର ଲଗାଏ 

ସେ ରଙ୍ଗରେ ଭିଜି ଜୋଛନାରେ ହଜି

ବଞ୍ଚିବା ଶିଖେଇ ଦିଏ ।

ସ୍ମୃତି ଯେତେବେଳେ କୋହ ମୋହ ହୋଇ

ଲୋତକରେ ଆଖି ଧୁଏ 

ସେଭଳି ସ୍ମୃତି ତ ହୃଦୟକୁ ଦହି

ଜୀବନ୍ତରେ ମାରିଦିଏ ।

ସୁଖ ସ୍ମୃତି ହେଲେ ବହୁତ ହସାଏ

ଦୁଃଖ ସ୍ମୃତି ଜାଳିଦିଏ 

ସେ ଜଳା ନିଆଁରେ ହୃଦୟ ପୋଡ଼ିକି

ଛାରଖାର ହୋଇଯାଏ ।

ମଧୁସିକ୍ତ ସ୍ମୃତି ମଧୁ ବରଷାଇ

ଜୀବନ ସଜାଡ଼ି ଦିଏ 

ଦୁଃଖଭରା ସ୍ମୃତି ଅକୁହା ବ୍ୟଥାରେ

ଜୀବନ ଉଜୁଡ଼ି ଯାଏ ।

ଅସଜଡା ସ୍ମୃତି ଦୁଃଖ ଦରିଆରେ

ବହିଗଲେ ଶାନ୍ତି ମିଳେ 

ସଜଡ଼ା ସ୍ମୃତିକୁ ସାଉଁଟି ରଖିଲେ

ପ୍ରୀତି ଦରିଆ ଉଛୁଳେ ।

ସଜଡ଼ା ସ୍ମୃତିକୁ ହୃଦୟରେ ରଖି

ଉଜୁଡ଼ା ବିଦାୟ ଦେଲେ 

ସ୍ଥିତି ଅବସ୍ଥିତି ପରଖି ନିରେଖି

ଅଶାନ୍ତିରୁ ଶାନ୍ତି ମିଳେ ।