ସିଂହ ସଙ୍ଗେ ମୁହାଁ ମୁହିଁ

ସିଂହ ସଙ୍ଗେ ମୁହାଁ ମୁହିଁ 

ହୋଇଗଲା ଦିନେ,

ଖାଇବାକୁ ଗୋଡାଇଲା

ନିଛାଟିଆ ବନେ;

କହିଲି ମୁଁ ରହିଯା' ରେ ଭାଇ,

ମୁହିଁ ତୋର ଶୁଭାକାଂକ୍ଷୀ 

ଶତ୍ରୁ ଜମା ନାହିଁ ।

ଦାନ୍ତ କଡମଡ କରି

ନିଶକୁ ଫୁଲାଇ,

କହିଲା ସେ ଅମଣିଷ

ଦୟା ତୋର ନାହିଁ;

ସୀମା ନାହିଁ ଲାଳସାର ତୋର

ନଖ ଦାନ୍ତ ଚର୍ମ ଲୋଭେ

କରୁ ତୁ ଶିକାର ।

ନିଜ ଘର ତୋଳିବାକୁ

ଭାଙ୍ଗୁ ଆମ ଘର,

ଗଛ କାଟି ଜଙ୍ଗଲକୁ

କରୁଛୁ ପ୍ରାନ୍ତର;

ଜଳ ବାୟୁ ହେଲାଣି ଦୂଷିତ,

ମିଛରେ ବୋଲାଉ କାହିଁ

ତୁ ଆମର ମିତ ?

ନିଜ ସଂଖ୍ୟା ବଢାଉଛୁ

ମାରି ଜୀବଜନ୍ତୁ,

ଧନ ସଞ୍ଚୁଅଛୁ ହେଲେ

ଧର୍ମ ନାହିଁ କିନ୍ତୁ ;

ରେ ନିର୍ଦ୍ଦୟ ଛାଡିବିନି ତୋତେ

ଏତିକି କହିଣ ପୁଣି

ଗୋଡାଇଲା ମୋତେ ।

ପାଟି କରି ଧାଇଁଲି ମୁଁ

ରକ୍ଷା କର ବୋଲି,

ହଠାତ୍ ନିଦ୍ରିତ ନେତ୍ର

ଗଲା ମୋର ଖୋଲି;

ପାଇଲି ନିଜକୁ ମୁହିଁ ଶେଯେ,

ସ୍ବପ୍ନ ଅବା ସତ୍ୟ ଥିଲା

ମନେ ମନେ ହେଜେ ।