ସିଧାକଥା-69

ବିନା କାରଣରେ କୌଣସି ଘଟଣା ଘଟି ନ ଥାଏ ସଂସାରେ,

କାମଦେଖି ଫଳ ଫଳୁଛି ଆମର ହେଉପଛେ ବିଳମ୍ବରେ |

ବିଶ୍ୱାସ ସୁଦୃଢ଼ ଥିଲେ ସଫଳତା ମିଳିଥାଏ ସହଜରେ,

ବିଶ୍ଵାସ ହରାଇ ଜିତିନାହିଁ କେହି କେବେ ଏହି ଜଗତରେ |

ଜୀବନ ହେଉଛି ଚିତ୍ର ଆଙ୍କିବାକୁ ଈଶ୍ୱରଙ୍କ ତୂଳୀଟିଏ,

ଆମେ ଆଙ୍କିଦେଲେ ଆବୁରୁ ଜାବୁରୁ ତାକୁ ଲିଭେଇବ କିଏ ?

ଈଶ୍ୱର ହସିବେ ଦୁନିଆ ହସିବ ରହିବ ଜନ-ମନରେ,

ଅତି ଯତନରେ ସୁନ୍ଦର ଚିତ୍ରଟି ଆଙ୍କିଦେବା ସେ ତୂଳିରେ |

ସମୟ ଚକ୍ରରେ ଜୀବନ ଆମର ଘୂରି ବୁଲୁଥାଏ ନିତି,

କେତେ ଦୁଃଖ-ସୁଖ ଯାତନା ଆନନ୍ଦ ଯାଉଥାଏ ଭେଟିଭେଟି |

କାନ୍ଦିବା ଛନ୍ଦିବା ରାନ୍ଧିବା ବାନ୍ଧିବା ଶୁଣିବାକୁ ଏକାପରି,

ଆଚରଣ ବେଳେ କିଏ ମାରୁଥାଏ ପୁଣି କିଏ ଯାଏ ମରି |