ସିଧାକଥା-50 ଲୋକହସା ହେବା
ସିଧାକଥା-50 ଲୋକହସା ହେବା
ନିଜ ଭାଷାରେ ଯେ କହେନା କଥା,
ଭାଷା ସୁରକ୍ଷାରେ ହେଉଛି ନେତା |
ପିଲାଙ୍କୁ ପଢ଼ାଏ ଅନ୍ୟ ଭାଷାରେ,
ଭାଷାପ୍ରେମ କଥା କହେ ନିଶାରେ |
ତମେ ସବୁ ମୂର୍ଖ ମୁଁ ଜଣେ ଜ୍ଞାନୀ,
ପରକୁ ଶୁଣାଏ ମହତବାଣୀ |
ନିଜଘରଟିକୁ ସଜାଡ଼େ ନାହିଁ,
ସାହିତ୍ୟ ସଭାର ମାଡେ଼ନା ଛାଇ |
ମାତୃଭାଷା ପ୍ରେମୀ ତାଙ୍କୁ କହିଲେ,
ମିଡିଆରେ ଛବି ଶୋଭା ପାଇଲେ |
ଜଗତେ କେବଳ, ଲୋକହସା ହେବା ତାହାର ଫଳ |
ଭାଗ୍ୟଵଳେ କିବା କୋଟାର ବଳେ,
ଚାକିରୀ ପାଇଲେ ସର୍କାରୀ କଳେ |
ଦରମା ପାଇଲେ ଯାହାକୁ ଯେତେ,
ଗରିବ ଦେଖିଲେ ମାରିବ ନାତେ |
ଲାଞ୍ଚ ପାଉଥିଲେ କରିବ କାମ,
ଧରା ପଡ଼ିଗଲେ କରମ ବାମ |
ସେବାଠାରୁ ନେବା କରେ ଯେ ଚିନ୍ତା,
ଭାବେ ସେ ଦେଶର ଭାଗ୍ୟ ବିଧାତା |
ଅଫିସର ବୋଲି କହିଲେ ତାକୁ,
ପାପ ଲାଗିଯିବ ଆମ ଦେଶକୁ |
ଜଗତେ କେବଳ,
ଜନେ ହସିବେ ଏହି ତହୁଁ ଫଳ |
ପ୍ରତିଶ୍ରୁତି ଦେଇ ଭୋଅଟ ମାଗେ,
ପ୍ରତିବାଦ କଲେ ବହୁତ ରାଗେ |
ଗଣତନ୍ତ୍ର ଅର୍ଥ ବୁଝେନା ଯିଏ,
ସମସ୍ୟା ଜାଣି ବି ନିରବ ରହେ |
ବିଧାନ ସଭାରେ ଢୁଳାଏ ବସି,
ଅଲାଜୁକ ପଣେ ଦିଏ ସେ ହସି |
ତାକୁ ଯଦି ଆମେ କହିବା ନେତା,
ଚିରଦୁଃଖୀ ହେବେ ଆମ ଜନତା |
କହିବେ ଲୋକ,
ନେତା ନୁହେଁ ଗୋଟେ ପାରଡ଼ା ପୋକ |