ସିଧା କଥା-51 କବିତା : ଜନ୍ମଦିନର ଶୁଭେଚ୍ଛା -ଡକ୍ଟର କୃତ୍ତିବାସ ନାୟକ

ଜନମ ଦିନର ଶୁଭ କାମନାରେ ଯଦି ଶୁଭଫଳ ଥାଏ,

ଜଗତ କରତା ସେ ଶୁଭଫଳକୁ ପହଞ୍ଚାନ୍ତୁ ତୁମଯାଏ |

ଜାତି କର୍ଣ୍ଣଧାର ହୋଇ ଏ' ଦେଶର ସ୍ୱନାମ ଅର୍ଜନ କର,

ଜୀବନଟା ହେଉ ସରସ ସୁନ୍ଦର ଏତିକି କାମନା ମୋର |

ଜାଗିଉଠୁ ମନେ ମାତୃଭୂମି ପ୍ରୀତି ମାଟି ପ୍ରତି ଅନୁରାଗ,

ଜୟଗାନ କରି ଚାଲିବେ ଜନତା ଦେଖି ତୁମସେବା-ତ୍ୟାଗ |

ଜଗିବ ନିଜର ସ୍ୱାଭିମାନ ପୁଣି ରଖିବ ହୃଦୟେ ଦୟା,

ଜଳାଇ ରଖିବ ହୃଦୟେ ଆଲୋକ ଛାଡ଼ି ଲୋଭ ମିଛ ମାୟା |

ଜୀବ ଜଗତରେ ତୁମେ ଶ୍ରେଷ୍ଠଜୀବ ତୁମ କାମ ହେଉ ଶ୍ରେଷ୍ଠ,

ଜାଣିଜାଣି କିଛି ଦାନ କରୁଥିବ ଦେଖିଲେ କାହାର କଷ୍ଟ |

ଜିତିବ ଦୁନିଆ ମନେ ରଖିଥିଲେ ସମୟ ହିଁ ବଳବାନ,

ଜିଜ୍ଞାସା ପ୍ରବୃତ୍ତି ଜାଗ୍ରତ କରିବ ମୂଲ୍ୟବାନ ବର୍ତ୍ତମାନ |