ଶୁକ
ଶୁକ
ପକ୍ଷୀ ଜନମର ସୁନ୍ଦର ଜୀବନ
ଗଢିଲା ଯେଉଁ ବିଧାତା
ଧନ୍ୟ ସେହି ବିହି ରଚିଲା ସଂସାର
ନର ପକ୍ଷୀ ପଶୁ ଚିତା ।
କଥା କହିପାରୁ ଶିଶୁଟିଏ ପରି
ଶୁଣିବାକୁ ଭଲ ଲାଗେ
"ପକ୍ଷୀ ଜନମରୁ ପାରି କର ହରି"
ଖନେଇ ଖନେଇ ଶୁଭେ ।
ତ୍ରିପୁର ବିଜୟୀ ରାବଣ ରାଜାର
ଶୁକ ସାରଣ ଅମାତ୍ୟ
ଗୁପ୍ତଚର ବିଦ୍ୟା ରାଜ୍ୟ ସମାଚାର
ନିର୍ଭୁଲ ଗଣନା ତଥ୍ୟ ।
ସ୍ବଚ୍ଛନ୍ଦେ ଆନନ୍ଦେ ବିଚରଣ କରୁ
ଅମ୍ବର ତୋ କ୍ରୀଡାସ୍ଥଳୀ
ନାଲି ରଂଗ ତଥା ବଙ୍କା ଥଣ୍ଟ ସହ
ଶରୀର ପତର ନେଳୀ ।
ନନ୍ଦୀଘୋଷ ରଥେ ଜୀବ ଓ ପରମ
କି ସୁନ୍ଦର ଶୋଭା ପାଅ
କିବା ଦୁଃଖ ଥାଏ ପ୍ରଭୁ ଜଗନ୍ନାଥ
ଯାହାକୁ ହେବେ ସହାୟ ।
ମହାମନ୍ତ୍ରୀ ଶୁକ ଦୂର କର ଶୋକ
କ୍ଷଣିକ ସାନ୍ନିଧ୍ୟ ଆଶା
ଦର୍ଶନାଭିଳାଷୀ ଅକିଂଚନ ଜନ
ମନରେ ବହୁ ଭରସା ।
ଧନ୍ୟ ତୁହି ଶୁକ ଜୀବନ ଅଶୋକ
ରାମ ନାମ ଗାଅ ମୁଖେ
ଅମୃତମୟ ବାଣୀର ପ୍ରଚାର
ପ୍ରସାର କର ଜଗତେ ।