ଶ୍ରୀ ପୁରୁଷୋତ୍ତମ

ପ୍ରଜାନୁରଂଜନ ପ୍ରଜାବତ୍ସଳ ସେ

  ଦଶରଥ ସୁତ ରାମ

ଦୂରୁ ଶ୍ରୀଚରଣେ ଅର୍ପଣ କରୁଛି

  ଘେନ ହେ ମୋର ପ୍ରଣାମ

ବାମାଙ୍ଗି ଜାନକୀ ଅନୁଜ ଲକ୍ଷ୍ମଣ

  ସେବାକାରୀ ହନୁମାନ

ମଧ୍ୟେ ବିରାଜନ୍ତି  ରାଜୀବ ଲୋଚନ

  ଶ୍ୟାମଳକାନ୍ତି ବରନ

ଅଯୋଧ୍ୟା ଦେଶରେ  ଶିଶୁ ଅବସ୍ଥାରେ

  ଭକ୍ତ କାକ ସଂଗେ ଖେଳ

ପ୍ରାଣପ୍ରିୟା ସିତେ  ଉଦ୍ଧାର କରିଲ

  ଭଲ୍ଲୁକ ବାନର ମେଳ

ମାରିଚ ସୁବାହୁ   ତାଡକାକୁ ମାରି

  ସୁଗ୍ରୀବେ ବସିଲ ମିତ

ଅନୀତି ଦୁର୍ନୀତି  ବଳଶାଳୀ ବାଳି

  ଶରୀରକୁ କଲ ମୁକ୍ତ

ସମାଜ ବିରୋଧି  ଅସୁରଙ୍କୁ ବଧି

  ଭାରତେ ଶାନ୍ତି ସ୍ଥାପନା

ରାମ ରାଜ୍ୟ ଗଢି  ପ୍ରଜାଙ୍କ ନିମନ୍ତେ

  ଅମାପ ପରିକଳ୍ପନା

ସୂର୍ଯ୍ୟବଂଶୀ ରାଜା  ରଘୁନନ୍ଦନ ହେ

  କୋଦଣ୍ଡଧାରୀ ରାଘବ

ସତୀ ସୀତା ପତି  ବାନରଙ୍କ ସାଥି

  ଅମୃତ ଦୃଷ୍ଟି ଦେବ

ରାବଣ ତାରଣ   ଦୁଷ୍ଟ ନିବାରଣ

  ସନ୍ଥ ପାଳନର ହିତେ

ବଇକୁଣ୍ଠପୁରୁ  ଆସନ୍ତି ଶ୍ରୀରାମ

  ଦରଶନ ଦେବେ ଚିତ୍ତେ

କୈବର୍ତ୍ତ ଶବରୀ   ମନ୍ଥରା ସମେତ

   ଦେଇଅଛ ସନମାନ

ଗୋଲକ ବିହାରୀ  ରାମ ଅବତାରୀ

   ବିଷ୍ଣୁ ଶ୍ରୀପୁରୁଷୋତ୍ତମ