ଶୁଭ ଦୀପାବଳୀ
ଶୁଭ ଦୀପାବଳୀ
ମରତ ଭୁବନେ ଭାରତ ରାଇଜେ
ହିନ୍ଦୁ ପର୍ବ ଦୀପାବଳୀ
ସତ୍ୟର ସ୍ଥାପନେ ଦୁଷ୍ଟ ନିବାରଣେ
ବିନିଷ୍ଟ ହୁଅଇ କଳି।
ଶ୍ରୀ ରାମଚନ୍ଦ୍ରଙ୍କ ରାଜ୍ୟ ଲେଉଟାଣି
ଆଜିର ପବିତ୍ର ତିଥେ
ଅବଧପୁରୀରେ ଅଭ୍ୟର୍ଥନା ପର୍ବ
ଜାନକୀ ଲକ୍ଷ୍ମଣ ସାଥେ ।
ମାଆ ମହାକାଳୀ ନୃମୁଣ୍ଡ ମାଳିନୀ
ଜଗତ ଉଦ୍ଧାର ପାଇଁ
ଓହ୍ଲାଇ ଆସିଛି ଏ ଧରା ପୃଷ୍ଠ କୁ
ରଣଚଣ୍ଡୀ ବେଶ ହୋଇ।
ମା' କୁ ଡାକନ୍ତି ପୁରଜନ ବାସୀ
ବିପଦୁ ତରିବା ପାଇଁ
କାଳୀପୂଜା ବୋଲି ଆଜିର ଦିନଟି
ଆଡ଼ମ୍ବରେ ପୂଜା ହୋଇ।
ମାଆ ହେଲେ ସାହା ଯେତକ ବିପଦ
ସବୁ ହୋଇଯିବେ ଆଡ
ଖଡ୍ଗ- ଧାରିଣୀ ସନ୍ତାନ -ରଙ୍କୁଣୀ
ଜଗିଥିବ ହୋଇ ବାଡ଼।
ପିତୃ ପୁରୁଷଙ୍କୁ ଆମନ୍ତ୍ରଣ କରି ଆଣି ଥାନ୍ତି ନିଜ ଦେଶେ
ଆଶ୍ୱିନ ମାସର ଅପରପକ୍ଷ ସେ
ମହାଳୟା ଅମାବାସ୍ୟେ।
ସମ୍ମାନିତ କରି ପୂଜା ପିଣ୍ଡ ଦେଇ
କରିଥାନ୍ତି ଆଶିର୍ଭିକ୍ଷା ।
ହିନ୍ଦୁ ରୀତି- ନୀତି ପ୍ରଚଳିତ ଏହି
ସୁନ୍ଦର ଜୀବନ ଶିକ୍ଷା
ମୃତାନ୍ତରେ ମଧ୍ୟ ଆତ୍ମୀୟ ସ୍ଵଜନେ
ଏତେ ଆପଣାର ବୋଲି
ମୃତ୍ୟୁ ଲୋକର ସେ ପୁରୁଷେ ଭାବନ୍ତି
ସାକ୍ଷାତ ଜୀବନ୍ତ ଭଳି ।
ଆଦର ସମ୍ମାନ ଅଭ୍ୟର୍ଥନା ପାଇ
ତିଷ୍ଠିଥିଲେ ମର୍ତ୍ତ୍ୟ ଘରେ।
ପୟା- ଅମାବାସ୍ୟା ଦୀପାବଳୀ ଦିନ ଫେରିବାକୁ ପ୍ରେତପୁରେ ।
ଅନ୍ଧାରରେ ଆସି ଆଲୁଅରେ ଯାଅ
ହେ ପିତୃ- ପୁରୁଷ ଗଣେ
ବିଦାୟ ଦିଅନ୍ତି କାଉଁରିଆ ଜାଳି
ହାତେ ଧରି ଜଣେ ଜଣେ ।
ଜନମ- ମରଣ ମାନବ ଜୀବନେ
ସ୍ୱପ୍ନ- ଜାଗରଣ ପରି
ବନ୍ଧୁ ବାନ୍ଧବ ଓ ପର ପରିଜନ
ସଭିଙ୍କୁ ନିଜର କରି ।
ହିନ୍ଦୁ ଧରମର ମହାନ ଏ ବାର୍ତ୍ତା
ପୃଥିବୀରେ ବ୍ୟାପି ଯାଉ
ସୁଖ ଶାନ୍ତି ପୁଣି ପ୍ରେମ ଓ ବନ୍ଧୁତ୍ୱ
ସଭିଙ୍କୁ ପ୍ରାପତ ହେଉ।