ଶ୍ରମିକ ଦିବସ
ଶ୍ରମିକ ଦିବସ
ଶ୍ରମିକ ଦିବସେ ସନ୍ଦେଶ ଜଣାଏ
ଘେନ ଯଥା ମାନ୍ୟ ମୋର,
ଫଳ ଚାହଁ ନାହିଁ କର୍ମ କରି ଚାଲ,
ଏ ବାଣୀ ଶ୍ରୀକୃଷ୍ଣଙ୍କର ।
ସକାଳରୁ ସଂଧ୍ୟା କର୍ମ କରି ଚାଲ
ସମାଜର ସେବା ପାଇଁ,
ଆଳସ୍ୟ ନକରି କର୍ମଠ ହୁଅରେ
ପ୍ରଗତିର ବ୍ରତୀ ହୋଇ ।
ଭିନ୍ନ ଭିନ୍ନ କର୍ମ ଯେତେ ସବୁ ଅଛି
ନୁହେଁ ଛୋଟ ବଡ଼ କେହି
ଯେଉଁ କର୍ମ ହେଉ ତା ସ୍ଥାନରେ ବଡ଼
ବିଜ୍ଞ ଜନେ ଛନ୍ତି କହି ।
ଶ୍ରମିକ ହୋଇଣ କୃଷି କର୍ମ କର
ଖାଦ୍ୟର ଯୋଗାଣ ପାଇଁ,
ତୋଳ କୋଠା ବାଡ଼ି କର ରାସ୍ତା ଘାଟ
ନିର୍ମାଣ ଶ୍ରମିକ ହୋଇ ।
କର୍ମ କରିଚାଲ ସତ୍ୟ ପଥେ ରହି
ଈଶ୍ୱର ହୋଇବେ ସାହା
କର୍ମ କରୁ କରୁ ଅବାଟରେ ଗଲେ
ବିଭୁ ଦେଖାଇବେ ରାହା ।
ଅଳସୁଆ ନୋହି କର୍ମଠ ହୋଇବ
ମାନବ ସେବାର ପାଇଁ
କର୍ମଠ ଜୀବନ ଅଟେ ଭାଗ୍ୟବାନ
ଧନ୍ୟ ତା ଜୀବନ ହୋଇ ।
ମନୁଷ୍ୟ ଜୀବନ କର୍ମରେ ବିଶ୍ୱାସ
କହେ ଗୀତା ଭାଗବତ
କରହେ ସାର୍ଥକ ନିଜର ଜୀବନ
କରି କର୍ମ ସେବା ବ୍ରତ ।