ଶ୍ରୀ ଜଗନ୍ନାଥ

ଷାଠିଏ ପଉଟି ଅଣ୍ଟିଲାନି ବୋଲି 

ଦାସିଆ ନଡ଼ିଆ ନେଲୁ

ସୁଦାମା ଭଳି ବନ୍ଧୁ ଥାଉ ଥାଉ

ମହାନ୍ତିକୁ ବନ୍ଧୁ କଲୁ ।

ଶ୍ରୀ ମନ୍ଦିର ରତ୍ନସିଂହାସନ ଥାଉ ଥାଉ

ନନ୍ଦି ଘୋଷେ ବିଜେ କଲୁ

ନନ୍ଦିଘୋଷ ରଥ ଥାଉ ଥାଉ ତୋର

ବାଲି ରଥେ ମନ ଦେଲୁ ।

ଘିଅ ଅମ୍ବରୁତ ଛେନା ଥାଉ ଥାଉ

ପୋଡ଼ ପିଠାକୁ ଖାଇଲୁ

ଶ୍ରୀ ମନ୍ଦିର ଛାଡି ଦାଣ୍ଡକୁ ବାହାରି

ଭକ୍ତଙ୍କ ମନ ମୋହିଲୁ ।

ଭାଇ ଭଉଣୀଙ୍କୁ ସାଙ୍ଗରେ ନେଇ

ସ୍ତ୍ରୀକୁ ଘରେ ଛାଡିଲୁ

ଲକ୍ଷ୍ମୀ ଭଳି ସ୍ତ୍ରୀ ମନ୍ଦିରରେ ଛାଡି 

ମାଉସୀ ଘରେ ରହିଲୁ ।

ଲକ୍ଷ୍ମୀ ହଟହଟା କରିଥିଲେ ବୋଲି

ଲକ୍ଷ୍ମୀଙ୍କୁ ଏକାକୀ କଲୁ

ନଅ ଦିନ କାଳ ବାହାରେ ବୁଲି

ଲକ୍ଷ୍ମୀ ଠୁଁ ବଦଲା ନେଲୁ ।

ଲକ୍ଷ୍ମୀ ଭାଙ୍ଗିଦେଲେ ନନ୍ଦିଘୋଷ ତୋର

ରାଗ ତମ ତମ ହୋଇ

କିଛି କହିଲୁନି ଚୁପଚାପ ରହିଲୁ

ମୁରୁକି ହସକୁ ଦେଇ ।

ନଅ ଦିନ କାଳ ବାହାରେ ରହିଲୁ

ଲକ୍ଷ୍ମୀଙ୍କୁ ଚିଲେଇ ଚିଲେଇ

ଭକ୍ତଙ୍କ ମେଳରେ ଶ୍ରୀ ମନ୍ଦିର ଫେରିଲୁ

ଲକ୍ଷ୍ମୀଙ୍କୁ ବୁଝେଇ ସୁଝେଇ ।