ଶ୍ରବଣ କୁମାର

ପିତା ମାତା ମୋର ପ୍ରାଣ ଠୁଁ ପ୍ରିୟ

ତାଙ୍କରି ଚରଣ ମୋ ପାଇଁ ସ୍ଵର୍ଗ,

ଲୋଡା ନାହିଁ ମୋର ଧନ କି ଯଶ

ଜନକ, ଜନନୀ ଏକ ହିଁ ମାର୍ଗ ।

ମୋ ହୃଦ ମନ୍ଦିରେ ତାଙ୍କରି ଛବି

ଅନ୍ୟ ଦେବ କାହିଁ ପୂଜିବି ଆଉ,

ଜନ୍ମଦାତା ଦାନ‌ ଏ ଘଟ ଜ୍ୟୋତି 

ତାଙ୍କରି ସେବାରେ ଏ ପ୍ରାଣ ଯାଉ ।

ଜାଣେନା ପୂଜା ମୁଁ ହରି ,ଶଙ୍କର

ନ ଦେଖେ ନେତ୍ରେ ମୋ' ଆନ

ପିତା ମୋର ଲାଗି ସାକ୍ଷାତ ଇଶ୍ଵର

ମା'ର ମମତା ମୋ' ଗୁପ୍ତ ଧନ ।

କଣ୍ଟକିତ ପଥ ଲାଗେ ପୁଷ୍ପ ଭରା

ସଙ୍ଗେ ଥିଲେ ପିତା ମାତା,

ମୁହିଁ ନୁହେଁ ଦୁହେଁ ମୋ ଆଖି ଲଉଡି

ଦୁହେଁ ମୋ ଭାଗ୍ୟ ବିଧାତା ।

ଶ୍ରବଣ କୁମାର ନାମଟି ମୋହର

ଶ୍ରବଣେ ଗୋଚର ପିତା ଆଦେଶ

ମା'ର ପଣତ ମୋ' ରକ୍ଷା କବଚ

ଜନ୍ମଦାତା ପଦେ ଜୀବନ ଶେଷ ।