ଶ୍ମଶାନ
ଶ୍ମଶାନ
ରାଜା ରଙ୍କ ମୋ ପାଖରେ
ସଭିଏଁ ସମାନ ।
ମୋ ଅଙ୍କରେ ସଭିଙ୍କୁ ମୁଁ
ଦେଇଅଛି ସ୍ଥାନ ।୧।
ଶ୍ମଶାନ ମଶାଣି ମରାଖାଇ
କେତେ ନାମ ମୋର ।
ଲୋକଙ୍କର ଶେଷ ଆଶ୍ରା
ମୋର କଳେବର ।୨।
ଦେଖିଛି ମୁଁ ରିକ୍ତ ହସ୍ତେ
ଯାଆନ୍ତି ସରବେ ।
ଏ ଧରାରୁ କେହି କିଛି
ନେଇ ନାହିଁ କେବେ ।୩।
ସରଗକୁ ଗଲା ଅବା
ନରକକୁ ଗଲା ।
ଗଲା ବେଳେ ଜଣାଯାଏ
କେ କେମିତି ଥିଲା ।୪।
ଦେଖିଛି ଆଖିରେ ମୋର
କେତେ ମୁଁ କାହାକୁ ।
ମଡା ସାଜିଲେ ଆସନ୍ତି
ମୋହର କୋଳକୁ ।୫।
କୋଳେଇ ନିଏ ମୁଁ କରି
ଅତି ଆପଣାର ।
ଧନ୍ୟ ହୁଏ ମୋ ଜୀବନ
ସର୍ବେ ମୋ ନିଜର ।୬।
ସାମ୍ୟ ମୈତ୍ରୀ ଚେତନାର
ବାର୍ତ୍ତାବହ ହୋଇ ।
ସଭିଙ୍କୁ ଜାଗ୍ରତ କରେ
ଏ ବାରତା ଦେଇ ।୭।
ସଭିଙ୍କୁ ନିଜର କର
ଏଇ ସଂସାରରେ ।
ଦିନେ ତ ଯିବାକୁ ହେବ
ଆପଣା ରାସ୍ତାରେ ।୮।
ମୁଠାଏ ପାଉଁଶ ହୋଇ
ମିଶିବା ମାଟିରେ ।
କେତେ ଛନ୍ଦ କର କିଆଁ
ଜୀବନ କାଳରେ ।୯।
ଯୁଇରେ ଜଳିବା ଆଗୁଁ
ମୋତେ ଦେଖି ଯାଅ ।
ମୁଁ ମୋର ତ୍ୟାଗ କରି
ଅନ୍ୟ ପାଇଁ ରହ ।୧୦।