ସହିଯାଅ ମୁଣ୍ଡପାତି

ବାଡ଼କୁ କହିଲେ ବତା ଚମକୁଛି     

   ମୁଗ ମାଡ଼ରେ କୋଲଥ ଚୋପା

କାହାକୁ କହିଲେ କିଏ ଚମକୁଛି

    ମନରେ ମନରେ ହେଉଛି ଖପା ।

କାହାର କଥାକୁ ନିଜକୁ ନେବନି

   ନେଲେ ନିଜ ମନେ ହୋଇବ ଦୁଃଖ

ନିଜର ଦୁଃଖକୁ ଅନ୍ୟକୁ କହିଲେ

      ଶୁଣିବା ଲୋକ ହିଁ ପାଇବେ ସୁଖ ।

ଦୁଃଖକୁ କହିଲେ କିଏ ଶୁଣିବେନି

   ଫାଇଦା ନେବାରେ ଲାଗିବେ ଲୋକ

ସୁଖରେ ରହିଲେ କିଏ ସହିବେନି

     ବାର କଥା ପୁଣି କହିବେ ଲୋକ ।

ଯଦି ଚାହଁ ତୁମେ ଭଲରେ ରହିବ

      ମୋର କଥା ମନେରଖିବ

କିଏ କଣ କରୁଛି କାହିଁକି କରୁଛି

       ଏକଥାରୁ ଦୁରେ ରହିବ ।

ପର କଥାରେ ମୁଣ୍ଡ ପୁରେଇଲେ

      ଦାଣ୍ଡର କିଳାକୁ ଡାକିବ

ପର କଥାକୁ ଦୂରରେ ରଖିଲେ

       ହସ ଖୁସିରେ ଚଳିବ ।

ଏତ ସମାଜର ନୀତି

ଏଇ ସମାଜରେ ଚଳିବାକୁ ହେଲେ

          ସହିଯାଅ ମୁଣ୍ଡପାତି ।