ଶିଶୁ ଏକ ଫୁଲ କଢ଼ି🏵

ମାତୃଗରଭରୁ  ହୁଅଇ ଜନମ

  ନିଷ୍ପାପ ଶିଶୁଟି ହୋଇ

ଲାଳନ ପାଳନ  ସେବା ଯତନରେ

  ଛୋଟରୁ ବଡ଼ ହୁଅଇ ।୦। 

ସୁଗୁଣ ସୁବାସ  ଫୁଟି ମହକିବ

  ଶିଶୁ ଏକ ଫୁଲ କଢ଼ି

 ବୟସ କ୍ରମରେ  ସବୁ କରିଯିବ

  ଚନ୍ଦ୍ରକଳା ପ୍ରାୟ ବଢ଼ି

ସେନେହ ଶ୍ରଦ୍ଧାରେ  ଜୀବନ ବିତାଏ

  ପ୍ରିୟଜନ ପାଖେ ରହି ।୧।

ଶିଶୁର ବୟସ  ସଦା ହସ ହସ

  ରହେ ସର୍ବଦା ସରସ

ନୂଆ ନୂଆ ଅଭିନୟ କରିବାରେ

  ଥାଏ ମନରେ ହରସ

ସରଳ ତରଳ  କୋମଳ ମନରେ

  ସପନ ସୁଏ ଭାସଇ ।୨।

  

ଆଜିର ଶିଶୁଟି  ଆଗାମୀ ଦିନର

  ଏ ଦେଶର ନାଗରିକ

ଦେଶର ସୁନାମ  ଆଣଇ ଜୀବନେ

  ହୁଏ ଯେବେ ପରିପକ୍ୱ

ଦେଶ ଓ ଜାତିର  ସୁରକ୍ଷା କରିବ

  ମହାମାନବଟି ହୋଇ।୩।