ଶୀତଳଯୁଦ୍ଧ

ଶଶାଙ୍କ ଶେଖର ରାୟ

କେତେଦିନ ଆଉ ମରୁମରୁ ବଞ୍ଚିବା ଶିଖିବି

ଅହରହ ଘୋଡାଟାପୁର ଶବ୍ଦ ଆଉ ଯୁଦ୍ଧର ବିଗୁଲ

ଶୁଭୁଅଛି ମୋର କାନେ

ଭାଇଭାଇ ବାପପୁଅ ସ୍ଵାମୀସ୍ତ୍ରୀ ବନ୍ଧୁବାନ୍ଧବ

ସବୁ ସଂପର୍କ ଅଟେ ମିଛ

ସମସ୍ତେ ପରା ରକ୍ତରେ ଜୁଡ୍ ବୁଡ୍

ଅବିଶ୍ଵାସର ଧାରୁଆ ଅସ୍ତ୍ରରେ ।

ଶୀତଳ ଜହ୍ନରାତିରେ ବି ବହେ

ଏଠି ବୈଶାଖର ଝଞ୍ଜା ପବନ

ସନ୍ଦେହର ଅଦିନ କୁହୁଡି ଜାଳିପୋଡିଦିଏ କଅଁଳ ବଉଳ ଗୁଡିକୁ ।

ନିଜ ଛାଇ ମୋର ନିଜ ଶତ୍ରୁ

ଅହଂକାର ଢାଲ ଧରି ଆଜି

ହାଣିଚାଲିଛି ମୁଁ ମୋର ଅସ୍ତିତ୍ଵକୁ ମାନବିକତାକୁ

ନିର୍ଭୟରେ ନିଦ୍ଵନ୍ଦରେ ।

ଯୁଦ୍ଧର ନିୟମ ଜଣାନାହିଁ ମୋତେ

କେବେ ଖୁସି ହୁଏ ମୁଁ ଏଠି

ବିଜୟର ଟୀକା ପିନ୍ଧି ଲଲାଟେ

ପୁଣି କେବେ ପରାଜିତ ସୈନିକ ପରି

ପଳାୟନ କରେ ଲୁଚିଛପି ରଣକ୍ଷେତ୍ର

କିଛିଦିନ ବଞ୍ଚିଯିବାର ମୋହରେ।

ଲଢେଇ ଚାଲେ ଏଠି ସବୁବେଳେ ସବୁକାଳେ ।

ବିନା ଶବ୍ଦ ବିନା ଅସ୍ତ୍ର ବିନା ପ୍ରତିପକ୍ଷ

ସମସ୍ତଙ୍କର ଅଜାତରେ ଅଲକ୍ଷ୍ୟରେ

ହୃଦୟର କେଉଁ ଅନ୍ଧାରିଆ କୋଣରେ ।

ମୋ - ୭୩୭୭୧୯୭୯୯୯

ବଟରପଡା ରାଜକନିକା